Yekitiya Parêzeran a Bakur û Rojhilatê Sûriyeyê bi daxuyaniyekê bersiva Sendîkaya Parêzeran a hikumeta veguhêz a Sûriyeyê da û diyar kir ew projeyên parçekirina Sûriyeyê red dikin. Yekitiyê destnîşan kir ku çareseriya aloziya Sûriyeyê tenê bi dan û standina rast a di navbera hemû pêkhateyan de çêdibe.
Yekitiya Parêzeran a Bakur û Rojhilatê Sûriyeyê bi daxuyaniyekê bersiva daxuyaniya Sendîkaya Parêzeran a girêdayî hikumeta veguhêz a Sûriyeyê da.
Di destpêka daxuyaniya Yekitiya Parêzeran de hate gotin: “Di rewşa îro Sûriyeyê tê re derbas dibe. Alozî û şerên herî dijwar di serdemê de li vir têne jiyankirin. Ev rewşa li Sûriyeyê hebûna wê ya îro û pêşeroja wê dixe bin gefan û rastiya dîroka wê xirab dike. Rewşa Sûriyeyê tê re derbas dibe ji ber sîstema navendî ya rojekê jî nûnertiya pirengî û dîroka welat ne kiriye, pêk hatiye. Dûrxistina pêkhateyan û paşguhkirina wan, ferizkirina yekdesthiladariyê vê rewşa aloz, kûrtir dike. Ev jî di navbera niştecihên heman welatî de bê baweriyê çêdike.”
Di dewama daxuyaniyê de îşaret bi konferansa li Hesekê hate kirin û wiha dewam kir: “Lidarxistina ‘konfransa yekrêzî û yekhelwestiya pêkhateyên Bakur û Rojhilatê Sûriyeyê’ rewşeke xwezayî ye. Ev nûnertiya jiyana hevbeş û biratiyê dike. Ji destpêka aloziya Sûriyeyê ev biratî hatiye pêşxistin. Hemû pêkhate di yek sengerê de hatin cem hev û li dijî êrişên teroristane derketine. Wiha jî bersiva êrişên dewleta Tirk û çeteyên wê hate dayîn. Bi heman hevgirtinê li dijî hewldanên hikûmeta berê ya Şamê yên ji bo derxistina tevliheviyê derketine. Li herêmê nirxên civakî hatin parastin. Konfransa Hesekê bi armanca pêşxistina wan nirxan hate lidarxistin. Ji bo mezinkirina karê hevbeş û pêkanîna aştiya civakî ya xwe dispêre pirengiyê gaveke girîng bû. Parastina teybetmendiyan giringe. Ew jêdera rastîn a hêza civakî û peydakirina çareseriyan e. Tu behane ji bo yekdestdariyê û paşguhkirina aliyên din tune ye.”
Di daxuyaniyê de hate bibîrxistin ku konfransa li Hesekê bûye zemîna bingehîn a lidarxistina kongreyeke hemû pêkhateyên Sûriyeyê bîne cem hev û ev tişt hate zêdekirin: “Dê bibe jêdera rastîn a îradeya hemû gelê Sûriyeyê. Ev dûrî paşguhkirina aliyan pêk tê. Dibe zemîna pêkanîna çareseriyeke niştimanî ya li tevahî Sûriyeyê. Herêmên Bakur û Rojhilayê Sûriyeyê di ezmûna salan de bûye cihê herî bi ewle ya Sûriyeyê. Bi sedhezaran koçberên herêmên din himbêz kiriye. Ev hîn jî didome. Ev rola herêmê ya parastina aştiya gelerî nîşan dide. Berûvajî hin aliyan wê wekî gefê li ser xwe nîşan didin.”
Di berdewama daxuyaniyê de ev tişt hatin rêzkirin: “Axaftina li ser binpêkirina qanûnan û destûrê ji aliyê pêkhateyên Bakur û Rojhilatê Sûriyeyê li dijî rastiya heyî ye. Binpêkirina rast û têkbirina qanûnan ji kiryarên desthildariya navendî bi xwe ye. Ev ji kongreya şeklî ya danûstendinê ya li Şamê hate lidarxistin, heta danazana destûrî hemû li dijî itîfaqa 10’ê adarê ya di navbera fermandarê QSD’ê Mazlûm Ebdê û Birêz Ehmed El Şeri e. Ev diçe heta bi dehan binpêkirinên saziyên dewletê.
Berdewama tundiyê, nebûna baweriyê di navbera pêkhateyên civaka Sûriyeyê aloziya heyî kûrtir dike. Ji ber vê yekê parçebûn zêdetir dibe. Kongreyên banga jiyana hevbeş û hevgirtina pêhateyan dike, berûvajî rewşa niha ye. Ji ber tenê hevgirtin hêviya aştiyê ye.”
Di daxuyaniyê de bang li hemû hiqûqnas û azadîxwazan hate kirin ku gavên erênî ji bo avakirina welatekî hemû kesî hembêz dike biavêjin û ev tişt hate gotin: “Ev bi jiyana hevbeş û biratiya gelan pêk tê. Bi çêkirina zemîna lidarxistina kongreke Sûriyeyê ya niştimanî nûnertiya hemû pêkhateyên Sûriyeyê bike. Heta bighêje destûreke Sûriyeyê mafê pirengiya Sûriyeyê biparêze. Rumeta gelê Sûriyeyê biparêze. Dawî li tundiyê bîne.”
Di daxuyaniyê de daxuyaniya Sendîkaya Parêzeran a Navendî ya li Şamê hate şermezarkirin û hate gotin: “Em daxuyaniyên Sendîqaya Parêzeran a li Samê û daxuyaniyên din ên ji rayedarên hikûmetê derdikevin şermezar dikin. Di daxuyaniyên wan de berûvajîkirina rastiyan û parçebûn tê çêkirin. Ev li şûna banga danûstenan û yekîtiyê bikin. Em heta dawiyê pabendî yekîtiya Sûriyeyê ne. Hemû projeyên parçekirinê red dikin. Baweriya me bi pêerşoja werlat a xwe dispêre danûstendina rastî û hevkariya di navbera hemû pêkhateyan de heye. Divê qonaxa were ya avakirina Sûriya demokratîk û pireng e. Mafê her kesî tê de parastî be.”
