Dewleta Tirk çend roj berê ragihand ku ‘mafê hêviyê’ wê ji bo girtiyan neyê naskirin ku cezayê girtîgehê yê heta bi hetayê yê girankirî li wan hatiye birîn.
Nivîskar Mehmet Karakûş anî ziman ku ji bo pêvajoya aştiyê bi rengekî erênî bi pêş ve biçe divê Tirkiye ‘mafê hêviyê’ nas bike.
Mehmet Karakûş destnîşan kir ku ji bo azadiya Rêber Apo berpirsyarî dikeve ser milê komîsyonê.
Dadgeha Mafên Mirovan a Ewropayê (DMME) ji Tirkikyê xwest ku di mijara bikaranîna ‘mafê hêviyê’ de sererastkirinên qanûnî bike.
Lê belê Tirkiyê li gel 11 salên di ser re derbas bûn, têkildarî biryara ‘binpêkirinê’ gavek neavêtiye.
Dewleta Tirk çend roj berê ‘Plana Çalakiyê’ pêşkêşî Komîteya Wezîran a Konseya Ewropayê kir û ragihand ku ‘mafê hêviyê’ wê ji bo wan girtiyan neyê naskirin ku cezayê girtîgehê yê heta bi hetayê yê girankirî li wan hatiye birîn.
“Komîsyon xwe nade ber çareseriya pirsgirêka Kurd”
Nivîskar Mehmet Karakûş ku piştî 30 salên girtîhiştinê par hate berdan, li ser ‘mafê hêviyê’ û pêvajoyê ji ajansa ANF’ê re axivî.
Mehmet Karakûş da zanîn ku beriya her tiştî dewlet di van mijaran de xwedî tecrûbeyeke mezin e û got:
Dewlet ti carî bi hêzên muxalîf re li dora maseyê rûnenişt û bi vî rengî pirsgirêk çareser nekir.
Ji ber vê yekê li gel ewqas gavên hatin avêtin û sozên hatin dayin, helwesteke berevajî tê nîşandan.
Komîsyonek heye ku hatiye avakirin. Ev komîsyon ji navê xwe bigire heta bi armanca xwe, xwe nade ber çareseriya pirsgirêka Kurd ku pirsgirêkeke dîrokî ye.
Li gel vê yekê jî navê komîsyonê li gorî vê nehatiye diyarkirin, armanca xwe li gorî vê yekê nehatiye destnîşankirin.
Mehmet Karakûş: Dewlet Bahçelî soza xwe bi cih neanî
Karakûş bi bîr xist ku Devlet Bahçelî ji bo ‘naskirina mafê hêviyê’ ya ji Rêber Apo re bang kir, lê belê soza xwe bi cih neanî û dibêje:
Ti ji sozên hatin dayin bi cih nehatin anîn. Eger gel îro bêdeng dimîne û helwestekê nîşan nade, ev yek ji ber baweriya wan a ji PKK’ê û Rêber Apo ye.
Naxwe dewlet li nava civakê ne cihê baweriyê ye.
Mehmet Karakûş: Komîsyon divê azadiya Rêber Apo pêk bîne
Mehmet Karakûş destnîşan kir ku ji bo pêvajo bi rengekî erênî bi pêş ve biçe divê Rêber Apo karibe xwe bigihîne PKK’ê, beşên civakî û rewşenbîran û got:
Sedema herî mezin a bikarneanîna mafê hêviyê ji aliyê Tirkiyê ve, ji ber daxwaza neçareserkirina pirsgirêkê ye.
Eger bi rastî jî ‘mafê hêviyê’ bê bikaranîn, tevkariyên ku Birêz Ocalan li pêvajoyê bike, ne cihê nîqaşê ye.
Ji bo gelê Kurd û hêzên demokrasiyê wê bibe gaveke mezin. Divê dewlet soza ku daye bi cih bîne. Di vê mijarê de berpirsyariyeke mezin dikeve ser milê komîsyona li meclîsê.
