Neteweyên Yekbûyî ragihand ku di sala 2024’an de 383 xebatkarên alîkariya mirovî hatine kuştin.
Neteweyên Yekbûyî diyar kir ku ev rewş û bê-cezahiştina êrîşan ”îfadeya xemnexuriya şermezahiya civaka navneteweyî ye.”
Neteweyên Yekbûyî derbarê kuştina xebatkarên alîkariya mirovî de daxuyaniyek da.
Daxuyanî bi boneya 19’ê Tebaxê Roja Alîkariya Mirovî ya Cîhanî hate dayîn.
Hejmara kesên jiyana xwe ji dest dane li gorî sala 2023’yan ji sedî 31 zêde bûye.
Li gorî Neteweyên Yekbûyî sedema zêdebûna vê hejmarê kuştina 181 xebatkarên alîkariya mirovî yên li Xezeyê û 60 kesên li Sûdanê ye.
Li gorî daneyên Neteweyên Yekbûyî di sala 2024’an de 308 xebatkarên alîkariya mirovî birîndar bûne, 125 hatine revandin û 45 kes jî hatine binçavkirin.
Hate ragihandin ku piraniya êrîşan ji aliyê aktorên dewletê ve hatine kirin û piraniya kesên ku jiyana xwe ji dest dane jî xebatkarên xwecihî ne ku li welatê xwe kar dikirin.
Alîkarê Sekreterê Giştî yê Berpirsê Karên Mirovî yê Neteweyên Yekbûyî Tom Fletcher got:
”Êrîşa li hemberî hempîşeyên me tê wateya êrîşa li hemberî me hemûyan.
Ev êrîşên bi vî rengî û bê-cezahiştin xemnexuriya civaka navneteweyî nîşan didin.”
Fletcher, bang li aliyên xwedan hêz û raye kir ku sivîlan û xebatkarên alîkariya mirovî biparêzin û erîşkaran bidarizînin.
Neteweyên Yekbûyî ragihand ku êrîşên li ser xebatkarên alîkariya mirovî tên wateya binpêkirina hiqûqa navneteweyî û sabotekirina şensê jiyana bi milyonan kesan.
Her wiha Rêxistina Tenduristiyê ya Cîhanî (WHO) diyar kir ku di sala 2024’an de li 16 herêman li hemberî xizmetên tenduristiyê zêdetirî 800 êrîş pêk hatine û di encama van êrîşan de zêdetirî hezar û 100 xebatkarên tenduristiyê û nexweşan jiyana xwe ji dest dane.
Rêxistina Tenduristiyê ya Cîhanî da zanîn ku li gel van êrîşan pergala tenduristiyê ya zirardîtî zedetir têk diçe.
