Li Çînê civîna Konseya Serokên dewletan pêk hat.
Serokê Çînê Şî Cînpîng û gelek kesên beşdarî civînê bûn li ser pêşketina Rêxistina Hevkariya Şangayê axivîn.
Şî Cînpîng dibêje Rêxistina Hevkariya Şangayê bûye hêzek bi bandor li dijî hegemonya û siyaseta desthilatdariyê.
Serokê Çînê Xi Jinping (şî cînpîng) di vekirina civîna 25’emîn a Konseya Serokên Dewletan a li bajarê Tiencin a Çînê de li pêş Rêxistina Hevkariya Şangayê axivî.
Şî Cînpîng got:
“Bi parêzvaniya wekhevî û edaletê ya navneteweyî, û parêzvaniya tevlêbûna şaristaniyan, Rêxistina Hevkariya Şangayê bûye hêzek bi bandor li dijî hegemonya û siyaseta hêzê.”
Lîderê Çînî bang li endamên rêxistinê kir ku nakokiyên xwe bidin aliyekî û hevkarî û hevgirtinê pêş bixin û got:
“Divê em ji bo cîhanek piralî ya wekhev û rêkûpêk û aborî ya gerdûnî parêzvaniyê bikin, û pergala rêveberiya gerdûnî bêtir dadperwer û wekhev bikin.”
Çîn wê 280 milyon dolar bide welatên endam ên rêxistina hevkariya şangayê
Şî Cînpîng destnîşan kir ku Rêxistina Hevkariya Şangayê bi beşdariya 26 welatan wekî endam, çavdêr û hevkarên diyalogê bûye rêxistina herî mezin a herêmî ya cîhanê.
Serokê Çînê diyar kir ku hevkariya ku zêdetirî 50 deveran vedihewîne, nirxek nêzîkî 30 trîlyon dolarî afirandiye.
Şî Cînpîng teqez kir ku bazirganiya Çînê bi welatên endam ên Rêxistina Hevkariya Şangayê re ji 2.3 mîlyar dolarî derbas dibe û razemenî gihîştine 84 mîlyar dolarî û got:
“Ji bo ku em ji hêza bazarên me yên mezin û temamkeriya aborî ya di navbera welatên endam de bêtir sûd werbigirin, divê em hêsaniya bazirganî û razameniyê zêde bikin.
Her wiha hevkariyê di binesaziya enerjiyê, pîşesaziya kesk, aboriya dîjîtal, nûjeniya zanistî û teknolojîk û zekaya çekirî de pêş bixin.”
Şî Cînpîng ragihand ku welatê wî dê îsal 2 mîlyar yuan ango 280 mîlyon dolar bide welatên endam ên Rêxistina Hevkariya Şangayê.
Pezeşkiyan: Divê rêxistin ji bo cîhanek aştiyane û hevkariya aborî gavên berbiçav biavêje
Li aliyê din serokkomarê Îranê Mesûd Pezeşkiyan di civînê de axivî û pêşniyar kir ku ji bo birêvebirina krîzên herêmî komîteyek krîzê ya ji wezîrên derve pêk tê were avakirin.
Pezeşkiyan diyar kir ku divê ev komîte bi awayekî bilez bersivê bide binpêkirinên serweriya endamên xwe û got:
“Îran bawer dike ku Rêxistina Hevkariya Şangayê, yek ji stûnên girîng ên piralîbûna pergala navneteweyî, divê gavên berbiçav bavêje da ku cîhanek aştiyane û ji bo hevkariya aborî guncav biafirîne.”
Her wiha Pezeşkiyan axaftina xwe wiha domand:
“Divê komîteyek ji wezîrên karên derve yên welatên endam pêk were da ku li ser krîzên cûrbecûr ên ku aramiya herêmî tehdît dikin, nêrînan biguherînin.
Divê ev komîte xwediyê desthilatê be ku di krîzên cûrbecûr ên potansiyel û rastîn de li ser daxwaza endamek tavilê bicive.
Bi taybetî, dema ku serweriya endamek tê binpêkirin, divê ev mekanîzma tavilê bersiv bide.”
