Berdevka DEM Partiyê Ayşegul Dogan derbarê pêvajoya aştî û civaka demokratîk de, diyar kir divê teqez komîsyon bi Rêber Apo re hevdîtinê bike û got: “Eger hûn bi Ocalan re hevdîtinê nekin, hûnê ji armanca sereke dûr bikevin.”
Her wekî diyar kir wê hefteya pêş şandeyeke DEM Partî biçe Îmraliyê bi Rêber Apo re hevdîtinê bike.
Ayşegul bertek nîşanî gefên dewleta Tirk ên li ser Bakur û Rojhilatê Sûriyê jî da û ji wan xwest ji bo dostanî û çareseriyê bixebitin û bi rêveberiya xweser re hevdîtinê bikin.
8’ê Îlonê Civîna Desteya Rêveberiya Navendî ya DEM Partî hate lidarxistin.
Berdevka DEM Partiyê Ayşegul Dogan derbarê mijarên ku di civînê de hatin rojevê, îro daxuyaniya çapemeniyê da.
Ayşegul bal kişande li ser xebatên Komîsyona Hevgirtina Netewî, Xwişk-Biratî û Demokrasiyê ya ku di çarçoveya Pêvajoya Aştî û Civaka Demokratîk de hatiye avakirin û wiha got:
“Komîsyon bi Ocalan re hevdîtinê neke wê ji armanca sereke dûr bikeve”
“Ji bo ku xebatên komîsyonê bighêje encamê hinek pêwîstî hene. Eger hûn bi Ocalan re hevdîtinê nekin hûnê ji armanca sereke dûr bikevin. Tişta nû bi fêrbûnên berê ava nabe.”
“Divê rêya hevdîtina bi Ocalan re bê dîtin”
Ayşegul Dogan diyar kir komîsyon mecbûre rêya hevdîtina bi Rêber Apo re bibîne û wiha dewam kir,
“Ev pêwîstiyek e û divê bibe. Eger hûn dixwazin pêvajo li ser rêya xwe bi pêş de here, divê hûn rê li ber rêberekî ku xwedî lêgerîna çareseriyê û aştiyê ye û dixwaze pirsgirêkê li ser bingeha siyasî û hiqûqî çareser bike, vekin.
Divê teqez bi Birêz Ocalan re hevdîtin pêk were.”
“Divê ji bo mafê hêviyê herkes xwe berpirsyar bibîne”
Berdevka DEM Partî gotinên Dewlet Bahçelî yên, “Bila were li meclisê biaxive û mafê hêviyê bê naskirin” bi bîr xist û got:
“Li ser van gotinan re salek derbas bû. Desthilat, muxalefet û herkes divê xwe berpirsyar bibîne û xebatan bike.”
“Şandeyeke DEM Partî wê hefteya pêş biçe Îmraliyê”
Ayşegul Dogan diyar kir şandeyeke DEM Partiyê ku wê Hevserokên Giştî Tûncer Bakirhan û Tulay Hatimogullari jî cihê xwe di navê de bigirin wê hefteya pêş biçe Îmraliyê bi Rêber Apo re hevdîtinê bikin.
“Divê Tirkiye bi Bakur û Rojhilatê Sûriyê re hevdîtinan bike”
Li aliyê din Ayşegul bertek nîşanî gef û zimandêriya rayedarên Tirkiyê ên li ser Bakur û Rojhilatê Sûriyê da û got:
“Em her roj di daxuyaniyên ku tên dayîn de dibînin ku destketiyên Kurdan weke gefekê dibînin. Divê êdî vê helwesta xwe biguherînin. Ev ziman ne zimanê dostanî û çareseriyê ye.
Pêwîste rêveberên Tirkiyê bi rêveberiya Bakur û Rojhilatê Sûriyê re hevdîtinan bikin. Divê vebijêrka êrişekê tu caran neyê rojevê û em naxwazin vê îhtîmalê biaxivin. Divê li ser masê dostanî û çareserî hebe.”
