Meclisa Malbatên Şehîdan a taxên Şêxmeqsûd û Eşrefiyê merasîma şehîd Ebdîn Hemo û Birûsk Heleb li dar xist. Di merasîmê de soza domandina têkoşîna şehîdan hat dubarekirin.
Şêniyên taxên Şêxmeqsûd û Eşrefiyê yên Helebê cenazeyê endamê Komîteya Lihevanînê ya Meclisa Şehîd Cengîz a taxa Eşrefiyê Ebdîn Hemo yê ku di 10’ê Îlonê de ji ber nexweşiyê şehîd bûye oxir kir û nasnameya şervanê Hêzên Sûriya Demokratîk (QSD) Burûsk Heleb (Hemze Ehmed Mihemed) ê ku di 8’ê Îlonê de li bajarê Hesekê şehîd bûye, hat aşkerekirin.
Merasîm li qada Şehîdan a rojavayê taxa Şêxmeqsûd hat lidarxistin.
Di serî de dayika şehîd Şoreş Amne Xidiro li ser fedakariya şehîdan axivî.
Rêveberê Hêzên Ewlekariya Hundirîn Zagros Heleb jî soza parastina nirxên şehîdan û destkeftiyan dubare kir.
Bi navê malbata şehîd Ebdîn, Nebiye Hebeş li ser welatparêziya şehîd axivî.
Her wiha, rêveberê Meclisa Olî Şêx Elî El Hesen li ser pîroziya şehadetê û şehîdan axivî û soza domandina rêya wan dubare kir.
Di dawiya merasîmê de endama Meclisa Malbatên Şehîdan Zelûx Şêx Qenber wesîqeyên herdu şehîdan xwendin û radestî malbatên wan kirin. Piştre cenazeyê şehîdê sivîl Ebdîn Hemo li pakrewangeha Pino hat oxirkirin û yê şehîd Birûsk Heleb jî duh li gundê wî Menbetih hat oxirkirin.
