Komîsyona Hevgirtina Netewî, Xwişk-Biratî û Demokrasiyê ku di çarçoveya çareseriya pirsgirêka Kurd de hatiye avakirin civîna xwe ya 11’an li dar xist.
Karsazên ku di civînê de axivîn diyarkirin lêgerîna gelê Kurd ya li aştiyeke bi rûmet tenê bêdengkirina çekan nîne û hat gotin: “Divê daxwazên Kurdan yên azadiya ziman û nasnameyê bê naskirin.”
Ji Tirkiyê jî xwestin ku Kurdên li Sûriyê ji bo xwe weke gefekê nebîne û weke fersendekê bibîne.
Îro li meclisa Tirkiyê civîna 11’an ya Komîsyona Hevgirtina Netewî, Xwişk-Biratî û Demokrasiyê ku di çarçoveya pêvajoya aştî û civaka demokratîk de hatiye avakirin, pêk hat.
Di civîna îro de, li nêrînên karsaz, sazî û komeleyan hate guhdarîkirin.
Serokê Meclisê Nûman Kûrtûlmûş axaftina destpêkê ya civînê kir.
“Ne çareserkirina pirsgirêka kurd li pêşiya planên pêşerojê asteng e”
Di civînê de Serokê Komeleya Karsazan ya Bakurê Kurdistanê Şah Îsmaîl Bedirxanoglû axivî, diyar kir li herêmê baweriya civakê bi qedandina şer û pevçûnan çêbuye û got,
“Ne çareserkirina pirsgirêka Kurd li pêşiya planên pêşerojê, pêşxistina aboriyê û gavên demokratîkbûnê asteng e.”
“Divê astengiyên li pêş zimanê dayîkê bên rakirin”
Bedirxanoglû xwest astengiyên li pêş zimanê dayîkê bê rakirin, destûreke bingehîn ya wekhev bê avakirin û rêveberiyên xwecihî bên pêşxistin û wiha domand,
“Ji bo vegera PKK’îyan divê zemîna qanûnî bê amadekirin. Kurd welatibûna destûreke bingehîn ya nû dixwazin. Kurd dixwazin astengiyên li pêş zimanê wan bê rakirin û pê perwerdê bibînin û ev pêwîst e.
Ji bo perwerdê û xebatên siyasî divê sererastkirinên qanûnî bên kirin û astengî bên rakirin. Ji vê zêdetir jî ez daxwaza rêveberiyên xwecihî dikim.”
“Divê Tirkiyê Kurdên Sriyeyê weke tehdît nebîne”
Şah Îsmaîl Bedirxanoglû diyar kir divê Tirkiye Kurdên li Sûriyê weke gefekê nebîne û divê pêşketinên li wê derê weke fersendekê bibîne.
Bedirxanoglû gotinên Erdogan “Pirgirêkên Kurdên Iraq û Sûriyê pirsgirêkên me ne jî” bi bîr xist û anî ziman:
“Divê ev gotin li qadê veguhere siyasetê. Nêzîkatiyeke ku pirsgirêkên Kurdên Iraqê û Sûriyê weke pirsgirêkên xwe dibîne, wê Tirkiyê xurt bike.”
“Lêgerîna gelê Kurd ya li aştiyê tenê bêdenkirina çekan nîne”
Nûnera Komeleya Karsazên Jin ya Bakurê Kurdistanê Ozlem Kulahçî Tanaman jî di civîna komîsyonê de diyar kir lêgerîna gelê Kurd ya li aştiyeke bi rûmet tenê bêdengkirina çekan nîne û dibêje:
“Di heman demê de pêşwazîkirina mafên bingehîn û hemwelatîbûna wekhev e. Daxwazên Kurdan yên azadiya ziman û nasnameyê heye.”
Ozlem bal kişande li ser banga Rêber Apo û rawestandina şer û anî ziman bi gavên ku hatine avêtin li Tirkiyê demeke nû dest pê kiriye û got:
“Divê komîsyon vê pêvajoyê veguherîne aştiyê”
“Rawestandina şer, bandoreke erênî li qada siyasî, aborî û civakî kiriye. Pêwîste ev komîsyon vê pêvajoyê veguherîne aştiyê.”
