Artêşa Îsraîlê ku li Şerîda Xezayê, di 24 saetên dawî de zêdetirî 170 êrîşên hewayî li ser herêmê pêk anî.
Li gor agahiyan di êrişên dawî yên Îsraîlê de herî kêm 19 kes hatin kuştin.
Artêşa Îsraîlê ku li Şerîda Xezayê, di 24 saetên dawî de zêdetirî 170 êrîşên hewayî li ser herêmê pêk anî.
Artêşa Îsraîlê ku ji bo dagirkirina bajarê Xezayê êrîşên bejahî dest pê kiriye, li seranserê herêmê bombebaranên hewayî jî zêde kiriye.
Tevî van êrîşan, bi sedan hezar Filistînî li bajarê Xezayê dimînin.
Artêşa Îsraîlê, Filistîniyên ku tevî birçîbûn û êrîşan li ser erdên xwe dimînin, bi qetlîaman neçar dike ku ber bi başûrê herêmê ve koç bikin.
Ji aliyê din ve, di daxuyaniyeke nivîskî ya artêşa Îsraîlê de hate gotin ku di 24 saetên dawî de li Şerîda Xezayê zêdetirî 170 êrîşên hewayî hatine kirin.
Di daxuyaniyê de hate diyarkirin ku artêşa Îsraîlê êrîşên xwe yên li ser bajarê Xezayê jî zêde kiriye.
Di êrîşên Îsraîlê yên ji 7’ê Cotmeha 2023’yan û vir ve li Şerîda Xezayê hatine kirin, herî kêm 65 hezar û 419 kes hatin kuştin, 167 hezar û 160 kes jî birîndar bûne.
Di êrîşên dawî de 19 kes hatin kuştin
Li gorî çavkanîyên nexweşxaneyê, di êrîşên Îsraîlê de dîsa sivîl, penaberên ku di çadiran de dimînin, wesayît û avahî bûne armanc.
Li bajaroka Zewêyde ya Şerîda Xezayê, di êrîşa hewayî ya artêşa Îsraîlê de li ser maleke ku mirov tê de bûn, di nav de jin û zarok jî, 11 Filistînî jiyana xwe ji dest dan, 9 kes birîndar bûn.
Li bajarê Xan Yûnis ê başûr, di êrîşa balafirên şer ên Îsraîlê de li ser malekî, du jin di nav de, 4 Filistînî jiyana xwe ji dest dan, 13 kes jî birîndar bûn.
Her wiha li rojhilatê bajarê Benî Suheyla, di êrîşeke li ser malekê de ciwanekî Filistînî jiyana xwe ji dest da.
Li bajarê Xezayê, li herêma Tûnelê 2 kes, li Xan Yûnisê jî kesek di êrîşên leşkerên Îsraîlê de jiyana xwe ji dest dan.
Li taxa Tuffah, di encama êrîşeke li ser malekê de, di nav de 4 zarok, 15 Filistînî birîndar bûn.
Li derdora Gola Şêx Rıdvan a bakurê bajarê Xezayê, dronên Îsraîlê bombeyan li ser malan avêtin.
Herêmên bakur û rojavayê Xezayê bûn armanca topbarana artêşa Îsraîlê.
Fletcher: Ez li hemberî rewşa Xezayê xemgîn im
Cîgirê Sekreterê Giştî yê Neteweyên Yekbûyî yê Karûbarên Mirovî Tom Fletcher (Filetçir) got ew li hember “hovîtiya li Xezayê” bê çare û xemgîne ji ber ku “kesên dikarin vê hovîtiyê bisekinin bê deng in”.
Berpirsê payebilind ê NY Fletcher di civîna ser rewşa zarokên filistînî de ku ji aliyê Belçîka û Urdunê ve di çarçoveya Civîna Giştî ya NY`yê de hatibû birêxistinkirin, axivî.
Fletcher diyar kir ku li Xezayê, ev du sal in di her saetekê de zarokek tê kuştin, “yên ku şansên wan hebin di konan de radizin, dibistan bûne cihên tirsê, ku zêdetirî 700 hezar zarok ji mafê xwe yê perwerdeyê bêpar mane.
Fletcher anî ziman ku ji wan re her tim tê gotin ku “ev berdêla şer e ku divê şênî bi vî awayî yan awayekî din, bidin”.
