Li paytextê Fasê Rabatê, têkildarî daxwaza başkirina xizmetên perwerde û tenduristiyê ev sê roj in çalakiyên protestokirinê tên lidarxistin û roja Duşemê zêdetirî 60 ciwan hatine binçavkirin.
Çalakî, bi banga kolektîfa bi navê ‘GenZ-212” ya demeke kurt beriya niha hatî avakirin û xwe li ser medyaya dijîtal rêxistin kiriye, tên lidarxistin.
Li gorî nûçeya AFP’ê, hêzên ewlehiyê rê nedane ku xwepêşander li navenda paytext kom bibin û gelek ciwan binçav kirine.
Serokê şaxa xwecihî ya Komeleya Mafên Mirovan a Fasê Hakim Sikouk ragihand ku li Rabatê herî kêm 60 kes û li 4 bajarên welêt jî hin xwepêşander hatine binçavkirin ku hejmara wan nayê zanîn.
Xwepêşanderan dirûşmeyên weke; ”Gel daxwaza tenduristî, perwerde û hesabdayînê dike” berz kirin û daxwaza îstîfaya Serokwezîr Ezîz Ahannuş kirin.
Rayedaran, têkildarî kesên ku di rojên dawîn de hatine binçavkirin, daxuyaniyeke fermî nedane.
Li gorî rêxistinên mafên mirovan, dawiya hefteyê roja Şemiyê zêdetirî 70 kes û roja Yekşemê jî zêdetirî 100 kes hatine binçavkirin.
Hate ragihandin ku piraniya wan hatine berdan û 15 û 20 kes jî ji dozgeriyê re hatine sewqkirin.
Çalakiyên protestokirinê, di serdema newekheviyên mezin ên civakî û zêdebûna nerazîbûnên têkildarî pergala tenduristiyê de tên lidarxistin.
Li Madagaskarê di xwepêşandanan de 22 hatin kuştin
https://turkish.aawsat.com/d%C3%BCnya/afrika/5191914-madagaskardaki-g%C3%B6sterilerde-22-ki%C5%9Fi-%C3%B6ld%C3%BCld%C3%BC
Li aliyê din Komîseriya Bilind a Mafên Mirovan a Neteweyên Yekbûyî duh di daxuyaniyekê de ragihand ku di xwepêşandanên dijî hikûmetê yên li Madagaskarê de herî kêm 22 kes hatine kuştin û zêdetirî 100 kes jî birîndar bûne.
Li gorî Ajansa Nûçeyan a Fransî AFP, di daxuyaniya Ofîsa Komîseriya Bilind de hat gotin:
“Di nav qurbaniyan de xwepêşander û kesên derbasbûyî yên ji aliyê hêzên ewlehiyê ve hatine kuştin hene.
Her wiha kesên ku di dema tundiya berfireh û talankirina piştî xwepêşandanan de, ji aliyê kes an çeteyên ku ne girêdayî xwepêşanderan bûn, hatine kuştin jî hene.”
Duh li gelek bajarên Madagaskarê, xwepêşandanên dijî hikûmetê careke din geş bûn.
Hêzên ewlehiyê gazên rondikrêj bikar anîn da ku girseyên ku daxwaza îstifakirina Serokdewlet Andry Rajoelina dikirin belav bikin.
Li gorî Neteweyên Yekbûyî, hin karmendan cebilxaneyên rastîn bikar anîne.
Ev welatê girava Okyanûsa Hindî, ku yek ji welatên herî xizan ên cîhanê ye, ji serxwebûna xwe ya sala 1960’î ve gelek caran bûye qada xwepêşandanên dijî desthilatdaran.
