Bafil Talebanî di çalakiya propagandaya Parlementoya Iraqê ya li Silêmaniyê de destnîşan kir ku yên xaka wan firotine Tirkiye nikarin mafê wan biparêzin.
Serokê Yekîtiya Niştîmanî Kurdistanê (YNK) Bafil Talebanî di çalakiya propagandaya Hilbijartina Dema Şeşan ya Parlementoya Iraqê ya li Silêmaniyê de peyamên gelek girîng da.
Talebanî diyar kir ku wê li Bexdayê ne tenê mafê Kurdan wê mafê Iraqê jî biparêzin.
Bafil Talebanî bal kişand ser Partiya Demokratîk ya Kurdistanê (PDK) û got: “Aliyek heye xwe xwediyê we dizane. Ew piştî Enfala Barzaniyan piştî ewqas sûcan çûn li tanken Sedam siwar bûn. Gelo ma ewê kar ji bo we bikin? 31’ê Tebaxê ticar jî bîr naçe. Birîneke ya gelê Kurde. Ewan gotin, ‘têkiliya me û Sedam başe’. Wan ew sûc kirin. Wan Kurd şehîd kirin, di komkujiya Şengalê de Êzidî firotin. Reviyan, xaka me firotin Tirkiye. Gelo ma ewê bikare mafê we biparêze?”
Di dewamê de Talebanî got: “PDK’ê girtîgeh tije kirine ji rojnamevan û çalakvanên siyasî. Ji bo me qala azadiyê dikin. Hûn baş dizanin kîne xaka me difiroşin û pirsgirêka mûçe derdixin? Kê nefta Herêma Kurdistanê talan kir û ji bo xwe firotin? Hûn hemû dizanin sûcê kê ye û ji ber kê zarokên me tên bombekirin û dron diçin Hewlêrê. Xudê bela xwe li wan bide.”
Talebanî anî ziman ku tenê ew dikarin li Bexda pirsgirêkan çareser bike û got: “Me rê neda ku gaza me bibe, ji ber ku elektirîka me heye. Nikarin YNK’ê bêdeng bikin. Têkiliya YNK’ê bi Bexdayê re heye û ji bo berjewendiyên gel dikarin heta dawî kar bikin. Hêza me we diparêze. Emê li Bexda mafê we û azadiyê biparêzin. Li Silêmaniyê jî kî/ê dixwaze bila bi azad binivîse û baxive azade. Me piştrast kiriye kes ji yasayê mezintir nîne.”
Bafil Talebanî bang li ciwanan kir û diyar kir ku demeke ciwan hatine piştguhkirin û diyar kir ku ew weke YNK’ê wê zêdetir cih û rol bide ciwanan. Her wiha Talebanî diyar kir ku divê zêdetir cih bê dayîna jinan û di nava hemû aliyan de hebe.
Herî dawî Talebanî bang li her kesê kir ku biçe ser sindogan û dengê xwe bidin YNK’ê.
Sibe saet 07:00 ’an dema propagandaya hilbijartinê ya dema Şeşan ya Parlementoya Kurdistanê dawî dibe. Hêjayî bibîr xistinê ye 11’ê Mijdarê jî dengdan destpê dike.
