Yekitiya Şaredariyên Tebqayê di civîna xwe ya salane de pêşxistina asta îdarî û xizmetguzarî, berfirehkirina planên birêxistinkirina bajar û bajarokan, pêşxistina koordîneya di navbera saziyan de, dîtina çareseriyên mayînde ji pirsgirêka avê re, her wiha zêdekirina qadên hêşîn wek armanc danîn pêşiya xwe.
Yekitiya Şaredariyên Kantona Tebqayê civîna xwe ya salane li dar xist. Rêveber û endamên şaredariyan, Kombûna Jinan a Zenûbiya, nûnerên Rêveberiya Xweseriya Demokratîk a Kantona Tebqayê beşdarî civînê bûn. Civîn li hola Meclisa Gelan a li bajar pêk hat.
Piştî rêzgirtinê hevseroka Yekitiya Şaredariyan a Kantona Tebqayê Ferîda El Mihemed rewşa siyasî nirxand. Ferîdayê got: “Hikumeta veguhêz a Sûriyeyê hêviyên gel bi cih nayne, lê komên girêdayî wê komkujiyên li peravê û Siwêdayê pêk anîn, der barê van sûcan de jî tu helwest nedaye, lewre baweriya gel pê nemaye.”
Ferîda El Mihemed bal kişand ser sîstema Rêveberiya Xweser a li Bakur û Rojhilatê Sûriyeyê û got: “Herêmên Bakur û Rojhilatê Sûriyeyê sîstema Rêveberiya Xweser, hevserokatî û xeta demokratîk di nava saziyên sivîl û leşkerî de pejirandiye û pêk tîne.
Nêrîna giştî ya rêveberiyê li ser bingeha wekheviya di navbera hemû pêkhateyan de û mafên wan di diyarkirina çarenûs û azadiya derbirînê de, edaleta civakî û belavkirina adilane ya serwetan de ye.”
Piştî nirxandina rewşa siyasî, rapora xebatên salekê yên Yekitiya Şaredariyên Tebqayê hate xwendin û sînevîzyonek li ser xebatên girîng ên ku pêk anîne, hate pêşandan.
Her wiha astengiyên li pêşiya xebatên şaredariyan hatin vegotin; êrişên dewleta Tirk û çeteyên wê li ser stasyonên av û ceyarnê, qutkirina ava çemê Firatê û bandorên wê li ser hemû qadan wekî astengiyên sereke li pêşiya xebatên şaredariyê hatin destnîşankirin.
Der barê xebatên şaredariyan de nîqaş di navbera beşdaran û endamên dîwanê de çêbûn.
Beşdaran pesnê xebatên şaredariyan de, bi taybetî şaredariyên gundewarên rojavayê ku ji aliyê dewleta Tirk û çeteyên wê ve dihatin topbarankirin û bombebarankirin.
Beşdaran ji ber hin pirsirêkên di xebatan de rexne kirin. Nûnerên şaredariyan diyar kir ku kêmasiyên derketine dê çareser bikin.
Ferîde El Mihemed encamên civînê û armancên dema pêş vegotin û diyar kir ku armanca wan a pêşîn zêdekirina perwerdeya îdarî, berfirehkirina planên birêxistinkirina bajar û bajarokan, pêşxistina koordîneya di navbera şaredarî û aziyan de, dîtina çareseriyên mayînde ji pirsgirêka avê re, her wiha zêdekirina qadên hêşîn û zêdekirina çavdêriya zimhêrê ye.
