65 sal di ser şewata sînema Amûdê re derbas dibin.
Di wê rojê de 283 zarokan jiyana xwe ji dest dan.
Ji bo bibîranîn wê roja bi êş îro li bajarê Qamişlo Mîhrîcana fîlman a Navnetewî ya Rojava tê lidarxistin.
Di 13’ê Cotmeha 1960’yan de li Salona Sînemaya “Şehrezad” a li bajarê Amûdê, di bin navê destekdayîna şoreşa Cezayîrê ku li dijî mêtingeriya Fransayê liber xwe dida de, fîlmek hat pêşandan.
Pereyê ku ji pêşandana filmê bi navê “Şebeh Muntesef El Leyl” hatiye bidestxistin wê ji bo piştgiriya şoreşa Cezayîrê bihata şandin.
Wê rojê 500 şagirtên dibistanên seretayî ku temenên wan kêmtirî 12 salan bûn, li salona sînemayê hatibûn komkirin.
Lê salon têrî hejmarek wiha zêde nedikir.
Salona ku qaşo ji bo destekdayînê hatibû tijîkirin, wê rojê bû dojeh.
Dema film dest pê kir, ji nişka ve şewat derket û zarok hemû di hundir asê man.
Di şewata sînema amûdê de 283 zarokan jiyan xwe ji dest dan
Zarok li ber derî kom bûn ku derkevin lê ji ber hejmara zêde, derketin zehmet bû.
Şêniyên bajêr berê xwe dan cihê şewatê ku zarokên xwe xelas bikin.
Mihemed Seîd Axayê Deqorî yekem kesê ku karî derbasî salonê bibe da ku zarokan ji şewatê xilas bike.
Di nava şewata dijwar de, Mihemed Seîd Axayê Deqorî gelek zarok xilas kirin, lê ew bi xwe, di bin banê sînemayê yê ku hilweşiyan de ma û jiyana xwe ji dest da.
Ekîbên agirkujiyê yên hikûmetê bi hawarê nehatibûn.
Heta ku şewat vemirî, 283 zarokan jiyana xwe ji dest da.
Ji bo bîranîna zarokên şewitî Mîhrîcana Fîlman a Navneteweyî tê lidarxistin
Li beramberî vê komkujiyê, desthilata wê demê ku Komara Erebî ya Yekgirtî bû, tu lêpirsîn nekirin û heta niha jî tu encam derneketin.
Li şûna sînemayê niha abîdeya qurbaniyan hatiye çêkirin.
Her wiha bi pêvajoya şoreşa 19’yê Tîrmehê (2012) re jî, ji bo zindîhiştina bîranîna qurbaniyan di qada sînameyê de gavên girîng hatin avêtin.
Ku ji sala 2016’an ve Mîhrîcana Fîlman a Navnetewî ya Rojava tê organîzekirin û xeyalên zarokên qurbaniyên şewatê tê jiyanîkirin.
Mîhrîcana ku her sal di roja komkujiyê de tê lidarxistin.
Îsal jî wê mîhrîcan li bajarê Qamişlo were lidarxistin û weke “Çîrokên hevbeş, sînemaya azad” hatiye diyarkirin.
Di mîhrîcamê de wê di beşên film û senaryoyê de xelat werin dayîn.
Her wiha dê panel û semîner werin lidarxistin.
