Îstixbarata Îsraîlê raporek li ser faaliyetên Îranê yên derbarê bernameya nukleerî de weşand.
Di raporê de tê îddakirin Îran bi awayekî veşartî li Rûsyayê bernameya xwe ya nukleerî pêş dixe.
Li gorî Îsraîlê, Îran hewl dide bi pêşxistina bernameya nukleerî dîsa li heremê bibe hêzek hegemon.
Çavkaniyên îstîxbarata Îsraîlê, ragihand ku Îranê bi alîkariya rasterast û veşartî ya Rûsyayê bi dizî bernameya xwe ya çekên nûkleerî pêş dixe.
Tê gotin ku armanca vê hevkariyê, temamkirina qonaxa dawî ya bernameya Îranê ya çêkirina çekek nûkleerî ye..
Îstîxbaratê eşkere kir ku şandeyek ji Wezareta Parastinê ya Îranê serdana şîrketeke teknolojiya leşkerî ya Rûsyayê kiriye.
Li gorî Îstîxbaratê, ew şîrketa Rûsî di lîsteya ambargoya Amerîkayê de ye..
Îstîxbarat destnîşan dike ku di demekê de cîhan hemû bi şerên wekalet û manevrayên dîplomatîk re mijûl e, Tehran jî bi alîkariya rasterast û veşartî ya hikûmeta Rûsyayê bi dizî bernameya xwe ya çekên nûkleerî pêş dixe.
“Bernameya nukleerî ya Îranê bi alîkariya Rûsyayê berdewam dike”
Îstîxbaratê da zanîn ku ev hevkariya stratejîk bi awayekî bingehîn rewşa ewlehiyê ya tevahiya Rojhilata Navîn diguherîne.
Îstîxbaratê got:
“Ev hevkarî du rastiyên tirsnak îspat dike: 1. Îran bi awayekî çalak pêşxistina çekan dişopîne,
2. Rûsya wekî hevkarê wê yê sereke yê jeopolîtîk tevdigere, alîkariya Tehranê dike û bi lez û bez valahiya gihîştina kapasîteya nukleerî dagire.”
Rapora Îstîxbaratê dibêje ku armanca serdana veşartî ya şandeyeke girêdayî Wezareta Parastinê ya Îranê ji bo Rûsyayê ew bû ku ji Rûsyayê alîkarî werbigire, da ku çeka Atomî bidest bixe, bêyî ceribandina teqîna çekê.
Rapor balê dikişîne li ser xeteriya Îranê li ser Rojhilata Navîn diyar kir ku di nebûna helwesta ewlehiyê ya Îsraîlê, tevahî herêm li hember mîhwerek girêdayî rejima Îranê bê parastin dimîne.
“Rûsya dixwaze santralên nukleerî li Îranê berfireh bike”
Her wiha di raporê de hat gotin ku her çend Amerîkayê ceza li gelek sazî û kesayetan biriye jî lê dîsa jî fîzîknasê Îranê bi veşartî serdana Rusyayê dikin.
Her wiha hat got ku Rus dixwaze santralên Nûkleerî yên Îranê berfireh bike.
Heman demê Financial Times ragihandin ku di Tebaxa 2024’an de heya niha, zanyarên Îranî gelek caran çûne Rûsyayê.
