Berdevkê Kremlînê Dmitriy Peskov dibêje Putin plana aştiyê ya ku armanca wê bidawîkirina şerê li Ukraynayê ye red nekiriye û Rusya hêvî dike ku Amerîka hurgiliyên muzakereyan eşkere neke.
Peskov bal kişand ku Muzakere çiqas bêdeng bin ewqas bi bandor dibin û got:
“Formûlasyona ku Putin plana aştiyê ya Amerîkayê ya ji bo Ukraynayê red kiriye xelete, ne rast e.”
Li gorî Peskov, di navbera Putin û Trump de her tim gengaz e ku hevdîtina bi telefonê çêbibe, lê “niha divê encam di asta pisporan de bên standin.”
Berdevkê Kremlînê diyar kir ku Rûs amade ne ku bi rayedarên Amerîkî re ji bo çareseriyeke aştiyane heta ku pêwîst be bicivin.
Vladimir Putin di 2’yê Kanûnê de li Kremlinê Nûnerê Taybet ê Serokê DYA Donald Trump Steve Witkoff qebûl kir.
Di hevdîtinê de zavayê Trump Jared Kushner û şêwirmendên Putin Kirill Dmitriev û Yuri Uşakov jî amade bûn.
Hevdîtin nêzîkî pênc saetan dom kir.
Piştî hevdîtinên li Moskowê, derket holê ku Steve Witkoff û Jared Kushner diviyabû biçûna Brukselê ji bo hevdîtina bi Zelenskiy re, lê hevdîtin hate betalkirin.
Wezîrê Karên Derve yê Amerîkayê Marco Rubio diyar kiribû ku Rusya û Ukrayna ji sê salan vir ve ji her demê zêdetir nêzîkî peymana aştiyê ne, lê biryara dawî ya bidawîkirina şer tenê dikare ji aliyê Putin ve were dayîn.
Sekreterê giştî yê Nato’yê Mark Rutte bersiv da gefên Putîn
Li aliyê din Sekreterê Giştî yê NATO Mark Rutte diyar kir ku ew gefên Putin ên ketina şer bi Ewropayê re cidî nagrin û got ew ê bersiva her gotina Putin nedin.
Li gorî Rutte, riya aştiyê ji berdewamkirina zextê li ser Rusya û dabînkirina çekan a domdar ji bo ku Ukrayna xwe bi awayekî bi bandor biparêze derbas dibe.
Rutte dibêje berdewamkirina hewldanên dîplomatîk erênî ye, lê girîng e ku di dema muzakereyan de Ukrayna di pozîsyona herî xurt de be.
Berî hevdîtina bi Nûnerê Taybet ê Amerîkayê Steve Witkoff re, Putin gotibû ku “heke Ewropa şer li dijî Rusya bide destpêkirin” Rusya “amade ye bi Ewropa re şer bike”.
Li gorî Putin, Moskow “plana destpêkirina şer nake”, lê Ewropa dixwaze “têkçûnekê stratejik” bide Rusyayê.
Di heman demê de Putîn anî ziman ku Ewropa dev ji muzakereyan berdaye û got:
“Rusya wê bi Ewropa re nekeve şer, lê heke Ewropa dest pê bike em ji niha ve amade ne.
Wê demê rewşa ku kesek nikaribe danûstandinan bike derkeve holê.”
