Hikûmeta Awûstralyayê ragihand ku wê piştî êrîşa antîsemît li seranserê welêt bernameyeke kirîna çekan bide destpêkirin.
Serokwezîr Antony Albanese diyar kir ku piştî êrîşê wê yasayên li dijî zêdegaviyê werin tundkirin û anî ziman ku nayê qebûlkirin ku welatiyên sivîl ev qasî zêde xwedan çek bin.
Di çarçoveya bernameyê de ”wê êdî tezmînatê bide kesên ku çekên xwe yên zêde, nû hatine qedexekirin yan jî neqanûnî teslîm bikin.”
Ev pêngav, ji operasyona piştî komkujiya Port Arthur a di sala 1996’an de û 600 hezar çek hatin berhevkirin ve wê bibe mezintirîn paşvekirîna çekan.
Di wê serdemê de 35 welatiyan jiyana xwe ji dest dabûn.
Hefteyekê piştî êrîşê, roja Yekşemê wê li sernaserê welêt di saet 18.47 ‘an de bi vêxistina findan merasîma bîranînê were lidarxistin.
Serokwezîr Antony Albanese diyar kir ku ev yek wê bibe sekneke ku ”nefret û tundî Awûstralyayê pênase nakin.”
Her wiha li Plaja Bondi bi sedan kes li ser behrê xeleke mezin çêkirin û kesên ku di encama êrîşê de jiyana xwe ji dest dane, bi bîr anîn.
Her wiha Sydney hê jî di hişyariyê de ye.
Polîs li ser têkiliyên muhtemel dixebitin û lêkolîn dikin ku êrîşkar di seyaheteke xwe ya li herêma Mindanoa a Filîpînan de bi zêdegaviyan re ketine têkiliyê yan na.
Rayedaran dan zanîn ku têkilya hin kesên ku hatine binçavkirin bi bûyerê re tune ye û ji bo civakê ne weke rîskeke lezgîn in.
Awûstralya piştî êrişê dixwaze ‘nefretê’ bi tundî ceza bike
Li gel vê yekê Serokwezîr Anthony Albanese ragihand ku ji bo antîsemîtîzmê ji nava civakê bibe wê tedbîrên nû bêne wergirtin, li kesên ku gotinên nefretê belav dikin pêkanînan ferz bikin û vîzeyên van kesan betal bikin.
Her wiha wê lîsteya wan saziyan bê amadekirin ku lîderên wan gotinên nefretê dikin.
Serokwezîr diyar kir ku pêwendiya êrişê bi îdeolojiya DAÎŞ’ê re hebû.
Ji kesên jiyana xwe ji dest dan a herî biçûk Matilda ya 10 salî li Sydneyê bi merasîmekê hate veşartin.
Matilda bi malbata xwe ji Ûkraynayê koçî Awûstralyayê kiribû.
Mirina Matilda li welêt bû sedema nerazîbûneke mezin.
Nûnerên civaka Yahûdî jî îdîa dikin ku ji 7’ê Cotmehê û vir ve hişyariyên li hemberî antîsemîtîzmê têne dayin bi baldarî li ber çavan nehatine girtin.
Polîsan êrişkar Naveed Akram ê 24 salî bi terorîzmê û kuştina 15 kesan sûcdar kirin.
Bavê wî Sajid Akram ê di nava êrişê de bû, di dema bûyerê de hate kuştin.
