Pêvajoya “Aştî û Civaka Demokratîk”.
Bi vê banga Rêber Abdullah Ocalan li Tirkiye û Kurdistanê pêvajoyek nû hat destpêkirin.
Vê bangê rojeva tevahiya salê diyar kir.
Ka bi hev re binêrin bê di çarçova vê bangê de di nava salekê de çi qewimî.
Li Tirkiye û Kurdistanê di tevahiya sala 2025’an de, rojeva sereke Pêvajoya “Aştî û Civaka Demokratîk” bû.
Rojeva sereke pêngava ku Rêber Abdullah Ocalan daye destpêkirin û geşedanên li dora wê qewimî bûn.
Pêvajoya ku 27’ê Sibatê hat destpêkirin, wekî encama danustendinên hatine kirin û bersiva geşedanên li herêmê diqewimin hat nirxandin.
Vê banga Rêber Abdullah Ocalan deng veda û gelek derdoran nirxandin kirin, wekî destpêkirina pêvajoyek nû hat dîtin.
Nexasim şandeyên DEM Partiyê bi navberan çûn Îmraliyê û hevdîtin pêk anîn û bi rayedarên hikûmet û dewletê re axivîn.
Di hevdîtina şandeya DEM Partiyê ku 27’ê Sibatê li Îmraliyê hat kirin de Rêber Abdullah Ocalan gava dîrokî avêt.
Şandeyê heman rojê banga Rêber Apo a bi sernavê, “Aştî û Civaka Demokratîk” bi civînek çapemeniyê ji raya giştî re eşkere kir.
Di vê banga ku weke “banga dîrokî” hat binavkirin de Rêber Apo ji PKK`ê xwest ku xwe fesix bike û dawî li şerê çekdarî bîne.
1’ê Adarê PKK’ê li ser banga Rêber Apo agirbesta yek alî îlan kir.
PKK’ê di 5-7’ê Gulanê de jî Kongreya 12’emîn li dar xist û biryara fesihkirinê da.
Parêzerên Rêber Abdullah Ocalan piştî 6 salên astengkirinê, 15’ê Îlonê çûn Îmraliyê û hevdîtin pêk anî.
Rêber Apo got: “Pêwîste dewlet ji bo rêgeza mafê hêviyê gav biavêje”.
Malbata Rêber Apo û malbatên girtiyên din ên li Îmraliyê, di nava salê de 23 caran ji bo hevdîtinê serlêdan kirin.
Lê tenê 4 caran hevdîtin pêk hatin.
Rêber Apo di hevdîtina 18’ê Gulanê ya bi şandeya DEM Partiyê re de got:
“Pêdivî bi peymaneke nû ya li ser bingeha xwîşk-biratiyê heye.
Tişta ku me kiriye, guhertineke mezin a paradîgmayê ye” û xwest li parlamentoya Tirkiyeyê komîsyonek were avakirin.
9’ê Tîrmehê piştî 26 salan cara yekemîn daxuyaniya Rêber Apo a bi dîmen hate weşandin.
Rêber Apo got, “Ez ji hêza çekê na, ji hêza siyaset û aştiya civakî bawer dikim.” û gaveke din ya dîrokî da avêtin.
Piştî vê bangê, 11’ê Tîrmehê 30 gerîlayên PKK’ê , bi merasimeke li Silêmaniyê çekên xwe şewitandin.
Piştî merasîma çek şewitandinê, zext li ser dewleta Tirk hatin zêdekirin ku gav bavêje.
5’ê Tebaxê (2025) partiyên ku komên wan di Meclisa Tirkiyeyê de hene, Komîsyona Hevgirtina Neteweyî, Xwişk-Biratî û Demokrasiyê ava kir.
26’ê Cotmehê rêveberiya Tevgera Azadiyê Kurd, bi civînek çapemeniyê ragihand ku wan bi erêkirina Rêber Apo tevayî hêzên xwe ji Tirkiyeyê vekişandine.
6-7’ê Kanûnê DEM Partiyê “Konferansa Aştî û Civaka Demokratîk a Navneteweyî” li Stenbolê pêk anî.
Ji Kurdistan, Tirkiye û gelek welatên cîhanê rewşenbîr û siyasetmedar û rojnamevan tev li konferansê bûn.
