QSD’ê nasnameyên 3 şervanan aşkera kirin ku li cih û demên cuda de şehîd bûne.
Daxuyanî bi vî rengî ye:
“3 şervanên me yên leheng piştî meşeke bi rûmet a têkoşîna di nava refên hêzên me de, dema erkên xwe yên leşkerî de bi cih dianîn, di qezayên cuda de şehîd bûn.
Hevrêyê me Salim Ebdulletîf El Hemada dema ku bersiva êrişeke şaneyek rêxistina terorîst a DAIŞ’ê li gundewarê rojhilatê Dêrazorê dida, bi giran birîndar bibû. Tevî ku ji bo dermankirinê ji bo nexweşxaneyê hatibû veguhastin jî, çend roj şûnde ji ber birînên xwe gihaşt asta şehadetê.
Hevrêyê me şehîd Salim li bajarokê El Besîra di têkiliyên giştî de çalak bû. Li wir rolek girîng di avakirina pirên têkiliyê bi gelê herêmê re, nemaze bi eşîran re lîst. Ji ber rola wî ya berbiçav di xurtkirina aştiya navxweyî de, ji aliyê her kesî ve pir rêz lê dihat girtin. Şervanekî pir jêhatî bû. Xwedî jêhatîbûneke bêhempa û hesteke berpirsiyariyê ya bihêz bû. Ji ber van taybetmendiyên xwe beşdarî çareserkirina gelek pirsgirêkên eşîrî dibû. Bi gel re bû û pêdiviyên wan bi cih dianî. Hebûna hevrê Salim di nav serok û mezinên eşîran de bi bandor bû. Ew bi xwe yek qurbanê sûcên rêxistina terorîst a DAIŞ’ê bû, kesayetek welatparêz bû ku westandin nas nedikir. Heta kêliya şehadeta xwe ji hêzên me re dilsoz ma.
Hevrêyê me Eymen Hesen El Kelaş jî dema bersiva êrişeke şaneyên terorîst ên DAIŞ’ê gihaşt asta şehadetê. Hevrê Eymen di têkbirina êrişên terorîstan de heya kêliya dawîn bi lehengî li ber xwe dida.
Hevrêyê me yê şehîd Eymen ji malbatê ye ku rola zarokên wê di nava refên şoreşê de mezin e. Hevrê Eymen beşdarî pêngava dawîn a rizgarkirina Dêrazorê, bi taybetî rizgarkirina bajarê Baxozê bûbû. Di pêngavê de birîndar bibû. Lê tevî birînê jî mîsyona xwe domand ta pêngav bi serketinê tacîdar bû.
Hevrêyê me şehîd Orhan Ebdo Îsa jî ji malbatekê ye ku ji destpêkê ve cihê xwe di nava şoreşê de digire. Ferdên malbatê di berxwedana Kobanê û pêngava rizgarkirina Minbic de şehîd dane. Hevrêyê me jî ku ji fedakariyên xizmên xwe hêz û israr wergirt, bi bawerî û coşeke mezin tev li nava refên hêzên me bû. Di wê baweriyê de bû ku parastina gel û mîrateya şehîdan erkeke neteweyî ya ferz e.
Hevrêyê me Orhan beşdarî gelek perwerdeyên profesyonel bû ku asta wî ya leşkerî pêş xist. Piştî perwerdeyan bi lehengî û cesaret beşdarî berxwedana parastina pira Qereqozaqê bû. Li vir jî berxwedaneke bêhempa nîşan da û mohrek cuda li têkoşînê da.
Em ê wefadarên bîranînên hevreyên xwe Salim, Eymen û Orhan bin. Em ê têkoşîna wan a şoreşgerî bidomînin.
Bila serê malbatên hersê şehîdên me û tevahiya malbatên şehîdên me sax be. Berdêlên ku şehîdên me dane, dê hêza me ya herî xurt a parastina destkeftiyên bi saya xwîna wan bi dest ketine, bimînin.
Nasnameyên şehîdan:
Nasnav: Muhened
Nav û paşnav: Salim El Hemada
Navê dayikê: Zehra El Cemîl
Navê bav: Ebdulletîf
Cihê jidayikbûnê: Dêrazor
Cih û dîroka şehadetê: Hesekê-Nexweşxaneya Şehîd Sarya-25’ê Kanûna 2025
Nasnav: Yehya
Nav û paşnav: Eymen El Keleş
Navê dayikê: Sûriya
Navê bav: Hesan
Cihê jidayikbûnê: Dêrazor-El Bisêra
Cih û dîroka şehadetê: Dêrazor-El Bisîra-Sehba- 23’ê Kanûna 2025’an
Nasnav: Orhan Kobanê
Nav û paşnav: Orhan Ebdo Îsa
Navê dayikê: Emîne
Navê bav: Ebdo
Cihê jidayikbûnê: Kobanê-Gundê Mîl
Cih û dîroka şehadetê: Bendava Tişrînê-Qezaya Leşkerî- 26’ê Kanûna 2025’an.”
