Rêber Apo peyamek ji merasîma cenaze ya rojnamevan-nivîskar Huseyîn Aykol re şand.
Rêber Apo dibêje, “Ji bo min dost û hevrêyekî gelekî hêja bû. Kesayetekî gelekî durust û kedkar bû. Emê bîranîna wî di têkoşîna xwe bi rêzdarî bidin jiyîn.”
Rêber Apo ji merasîma cenaze ya rojnamevan û nivîskar Huseyîn Aykol re ku duh jiyana xwe ji dest da, peyam şand.
Peyam ji aliyê endamê Heyeta Îmraliyê Faîk Ozgur Erol ve hate xwendin.
Rêber Apo di peyamê de ji ber wefata Huseyîn Aykol xemgîniya xwe anî ziman û wiha got,
Rêber Apo: Ji ber wefata mamoste Huseyîn em gelek xemgîn in
“Em ji ber wefata mamoste Huseyîn di nav xemgîniyek mezin de ne.
Di serî de ji malbatê re, ji Çapemeniya Azad re, hevrêyê wî re, hezkirî û hogiran re sersaxiyê dixwazim.”
Rêber Apo diyar kir daxwaza Huseyîn Aykol ya dawî ew bû ku li gel wî hevpeyvînekê çê bike û dibêje,
Rêber Apo: Bi têkoşîn, gotin û pênûsa xwe bû şoreşgerekî mînak
” Ew daxwaza wî ji bo min hêja û watedar e. Bi mamoste Huseyîn re me di serê salên 90’î de derfeta hevdîtin û hevpeyvînê dîtibû. Eger ev mirina bêwext nebûya min dixwest wî bibînim û pê re sohbet bikim.
Ew kesayetekî enternasyonal bû ku jiyana xwe pêşkêşî şoreş û têkoşînê kiribû û ji bo min dost û hevrêyekî gelek hêja bû. Kesayetekî ji dil û kedkar bû.
Ev rewşenbîr û rojnamevanek bû ku bûbû dengê heqîqetê. Şoreşgerek bû ku şûna wî nayê tijekirin. Me pêşengekî enternasyonalîst ji dest da.
Di jiyana xwe ya têkoşînê de bi pênûs û helwesta xwe her tim bû pêşengek, rê nîşan da û şoreşgerekî mînak e.
Li cem min ew jî weke Gurbetellî Ersoz û Sirri Sureyya Onder hevalekî têkoşînê yê bêhempa bû.”
Rêber Apo: Huseyîn Aykol li dijî tariyê bû dengê heqîqetê
Rêber Apo diyar kir jiyana Huseyîn Aykol nîşaneya şênber a lêgerîna heqîqetê û berpirsiyariya civakî ye û wiha dibêje,
“Li dijî tarîtiyê dengê heqîqetê bû û wî li ser rêya Çapameniya Azad qet serî netewand.
Wî jiyana xwe fedayî azadiya gelan kir. Di têkoşîna wekheviyê de kêliyek jî dilgiranî nekir û bi baweriyek xurt heta nefesa xwe ya dawiyê ev al ji destê xwe nedanî û tişta pêwîst bi layiqî bi cih anî.
Rêber Apo: Têkoşîn û keda wî wê li ser vê xakê heta dawiyê bijî
Rêber Apo di dawiyê de diyar kir wê têkoşîna û keda Huseyîn Aykol di wîjdana vê axê de heta dawiyê bijî û dibêje,
“Em ê bibin şopdarên îdealên wî ku li paş xwe hişt, raman, têkoşîn û keda wî ya mezin.
Em ê bîranîna wî di têkoşîna xwe de her zindî bihêlin û bi rêzdarî bidin jiyîn.”
