Konseya Rêveber a KNK’ê, diyar kir ku ew piştgirî didin hevpeymaniya siyasî ya ku di 22’yê Sibatê de ji hêla 5 partiyên Kurd ve hatiye ragihandin û got, “Di pêvajoyeke wiha krîtîk de ev pêngav pêşketineke dîrokî û bi qîmet e.”
Di 22’yê Sibata 2026’an de pênc partiyên sereke yên Rojhilatê Kurdistanê di bin navê ‘Hevpeymaniya Hêzên Siyasî yên Kurdistana Îranê’ de tifaqa xwe bi deklarasyonek ragihandibûn.
Konseya Rêvebir a Kongreya Neteweyî ya Kurdistanê (KNK), têkildarê mijarê daxuyaniyeke nivîskî weşand.
KNK’ê, diyar kir ku ev tifaq gaveke girîng e ber bi yekîtiya neteweyî ve û bang li partiyên din ên Rojhilatê Kurdistanê kir ku tevlî tifaqê bibin.
Di daxuyaniya nivîskî ya KNK’ê de ev tişt hatin gotin:
“Di demeke ku li Rojhilata Kurdistanê û seranserê Îranê de, serhildan çêdibin û her wiha zextên welatên cîhanê li ser rejîma Îranê zêde dibin, pêkanîna yekîtiyeke bi vî rengî gelek girînge û gaveke pîroze. Em weke Kongreya Neteweyî ya Kurdistanê vê yekît.yê bi germî pêşwazî dikin û pîrozbahiyê li serokatî û rêveberiya van pênc partiyan dikin.
Li Rojhilatê Kurdistanê û seranserê Îranê weke berdewama şoreşa ‘Jin Jiyan Azadî’, ev du meh in serhildanek mezin heye. Li gel qetlîaman û bi deh hezaran birîndar û girtiyan jî, serhildan berdewame. Her wiha Dewletên Yekbûyî yên Emerîkayê jî hêzek leşkerî ya gelek mezin aniye herêmê û gefên êrîşan li Îranê dixwin. Her çend di navbera herdu aliyan de diyalog û hevdîtin hebin jî, dibe ku di demke nêzîk de êrîş li ser Îranê çêbin. Îran û herêma Rojhilata Navîn ber guhertinên mezin ve diçin. Ev rewş li gel xeteriyan be jî, di heman demê de derfetan jî bi xwe re tîne.
Di vê dema krîtîk da yekrêziya nav mala Kurdan gelek girînge û kareke jiyanî ye. Di vê demê de avakirina Hevpeymaniya Hêzên Siyasî yên Kurdistana Îranê, gaveke cihê keyfxweşiyê ye. Em hêvî dikin partiyên din jî yên li Rojhilata Kurdistanê, cihê xwe di nava vê hevpeymaniyê de bigrin. KNK’ê her gavekî ji bo yekîtiya nav mala Kurdan, girîng dibîne, silav dike û piştevaniyê lê dike.
Em hêvî dikin ku ev pêngava ku li Rojhilatê Kurdistanê hatî avêtin bibe parçeyek ji yekîtiya neteweyî ya giştî û xizmet ji konferansekî neteweyî re jî bike.
Bi vê munasebetê em careke din Hevpeymaniya Hêzên Siyasî yên Kurdistana Îranê, pîroz dikin û ji gelê me yê Rojhilatê Kurdistanê re azadî û serketinê dixwazin.”
