Şehîd Baran Êlecax, Şiyar Kobanê, Karker û Şîndar li Pakrewangeha Şehîd Dîcle ya Kobanê hatin oxirkirin.
Ji bo şervanên YPG`ê Baran Êlecax (Mistefa Mihmê) û Şiyar Kobanê (Wail Bozo) ên ku 25`ê Çileya îsal (2026) li gundê Qasimî şehîd bûbûn, her wiha şervanê YPG’ê Karker Rizgar û endamê Hêzên Asayîş Şîndar (Şîndar Mihemed Elî) ên di 5`ê Adarê de li gundê Şêxlerê yê Kobanê şehîd bûbûn, merasîma cenaze li Pakrewangeha Şehîd Dîcle hat lidarxistin.
Merasîmê bi beşdariya bi sedan kesî bi deqeyeke rêzgirtinê dest pê kir. Di merasîmê de endamê Meclisa Malbatên Şehîdan a bajarê Kobanê Eseed Ebûd sersaxî ji malbata şehîdan re xwest û soza şopandina rêya wan da.
Endama rêveberiya Asayîşa Kobanê Sozdar Şêxo jî sersaxî ji malbatên şehîdan re xwest û wiha got: “Em ê bi hemû hêza xwe li ber xwe bidin. Me di rêya rizgarkirin û parastina bajarê xwe de bi hezaran şehîdan dan. Lew ra divê em xwedî li mîraseya şehîdên xwe derkevin, şopdarên rêya xwe bin û doza ku şehîdên me dabûn pêşiya xwe temam bikin.”
Li ser navê malbata şehîd Şîndar Ocalan Mele jî got: “Em tu carî bi şehadetê xemgîn nabin. Divê em xwedî li mîrasa şehîdên xwe derkevin û şopdarên rêya wan bin.”
Piştî axaftinan wesîqeyên şehadetê yên şehîdan hatin xwendin û radestî malbatên wan hatin kirin.
Cenazeyên şehîdan bi dirûşmên “Şehîd namirin” spartin axê.
