Partî û hêzên siyasî yên Sûriyeyê danasînên ku berdevkê tîma serokatiyê Ehmed El Hîlalî li ser parêzgeha Hesekê û gelê Kurd bi kar anîbûn red kirin û diyar kir ku ev gotin dûrî rastiyên dîrokî û erdnîgarî ne û rastiya li vî welatî nîşan nade.
Partî û hêzên siyasî destnîşan kir ku ev daxuyanî di demekê de hatin kirin ku gelê herêmê li benda pêşvebirina hevkariyek rastîn di navbera pêkhateyên neteweyî û olî yên welatê Sûriyeyê de ye. Hat diyarkirin ku ev daxuyanî ji rastiyên dîrokî û erdnîgarî dûr in û zihniyetek nijadperest û mezhebî nîşan didin. El Hîlalî bi rêbazekî şantajê ya nebaş îdia dike ku Ereb piranî ne û Kurd ji hindikahiyan in.
Di dewama daxuyaniyê de hat gotin doz ne bi hejmarên abstrakt ên li ser texmînên şaş hatine çêkirin, lê bi kokên dîrokî û reseniya her pêkhateyekeê tê pîvandin.
Di daxuyaniyê de hate destnîşankirin ku gelê Kurd li Rojavayê Kurdistanê û li Bakur û Rojhilatê Sûriyeyê ne civakek awarte ye yan jî hindikahiyek koçber e, lê belê gelekî xwecihî ye ku li ser axa xwe ya dîrokî dijî û li seranserê Kurdistanê dirêj dibe ya ku li gorî peymanên navneteweyî, bi taybetî Peymana Sykes-Picot, bi darê zorê hatiye parçekirin.
Partî û hêzên siyasî da zanîn ku wesifkirina Kurdan bi hindikahiyê li hundirê Sûriyeyê paşguhkirina rastiya dîrokî ye û doza gelekî bi tevahî di çarçoveya serjimariyeke teng de qels dike, lê di heman demê de Kurd ji pêkhateya sereke û resen ên vî welatî ye, xwedî çand, ziman û taybetmendiyên xwe yên siyasî-neteweyî ne.
Di daxuyaniyê de hat gotin ku ji destpêka avakirina Sûriyeya nûjen, rojekê dewleteke yek-etnîkî nebûye, lê belê welatekî pir-netewe û ol bûye, tê de Ereb, Kurd, Suryan-Asûrî û hwd, Misliman, Xiristiyan, Cihû û Êzidî hebûne. Ev pirrengî ne rewşeke awarte ye, lê cewhera nasnameya Sûriyeyê ye.
Li gorî daxuyaniyê pêkhateya demografîk a niha ya Sûriyeyê encama tedbîrên nijadperest û şovenîst ên li dijî Kurdan e, ku bi zorê ji axên xwe yên dîrokî hatin derxistin, li şûna wan şêniyên Ereb û yên din hatin bicihkirin, ev yek jî bi Kembera Ereb tê binavkirin.
Di daxuyaniyê de hişyarî li ser wan guhertinên demografîk ên li Efrîn, Girê Spî û Serêkaniyê çêbûne hat dayîn.
Daxuyaniyê destnîşan kir ku axaftina li ser dewleteke ereb” bi wateya neteweperestiya dûrxistinî ne li gorî rastiya dîrokî ne jî li gorî xwestekên avakirina dewleteke nûjen a adilane ye.
Partî û hêzên siyasî got rêya rast ew e ku pirrengiya neteweyî û olî bi awayekî aşkera were naskirin û pergalek siyasî ya pirreng a nenavendî were avakirin ku şirîkatiyek rastîn di navbera hemû pêkhateyan de garantî bike, dûrî hişmendiya serdestiya hejmarî yan jî dûrxistinê.
Partî û hêzên siyasî daxuyaniyên Ehemd El Hîlalî ku zihniyeta dûrxistinê nîşan dide şermezar kirin û bang li hikumeta demkî ya Sûriyeyê kir ku sînorekê ji van reftarên ku nakevin xizmetî gel deyne.
