Jinên Komunîst ên Şoreşger der barê rojnameger Eva Maria Michelman û Ahmed Polat de ku ji aliyê hêzên hikumeta demkî ya Şamê ve hatine revandin, daxuyanî dan û got “We ew birine û hûn ê bidin.”
Dema ku çeteyên dewleta Tirk û hêzên hikumeta demkî ya Şamê di 18’ê Çileya 2026’an de êrişî bajarê Reqayê kir, rojnameger Eva Maria Michelman û Ahmed Polat bûyerên li bajêr dişopandin. Heta niha agahî ji her du rojnamegeran nehatiye wergirtin.
Jinên Komunîst ên Şoreşger der barê aqûbeta her du rojnamegeran de daxuyanî da. Daxuyanî li ber avahiya Neteweyên Yekbûyî ya bajarê Qamişloyê hat dayîn. Di daxuyaniyê de wêneyên Eva Maria û Ahmed Polat hatin hildan.
Endama Jinên Komunîst ên Şoreşger Ekîn Îsyan bi kurdî û endama Jinên Komunîst ên Şoreşger Emel Mihemed jî bi erebî daxuyanî xwend. Daxuyanî wiha ye:
“Eva Marîa û Ahmed Polad du rojnamevanên şoreşger in ku dengê şoreşa Rojava gihandine cîhanê û rûyê qirêj ê çeteyan bi belgeyan nîşan dane. Ew herî dawî di 18’ê Çilêyê 2026’an de li Reqayê li ser wezîfeya xwe ya rojnamevaniyê bûn. Dema ku li taxa Seyf El Dewlê ya Reqayê ji aliyê çeteyan ve hatin dorpêçkirin, karîbûn xwe bigihînin saziya Ciwanên Şoreşger. Wan qeyd kir ku şaneyên razayî yên çeteyên cîhadîst ên HTŞ’ê li bajarê Reqayê çawa ketine tevgerê û êrişên wan çi ne. Komek koçberên Efrînî jî mîna wan xwe gihandibûn saziya Ciwanên Şoreşger û bi hev re li benda bidawîbûna êrişan man.
Heman rojê, eşîrên alîgirên çeteyan ên Reqayî êrişî wê saziyê kirin. Heya saetên êvarê her kesî li saziyê li ber xwe da. Ahmet Polad vîdyoyên wan kêliyan girtibû û gihandibû kanalên televîzyonê. Piştî vê saetê têkilî qut bû û agahî ji Eva Marîa û Ahmed Polad nehat girtin.
Nêzî 3 meh e em li wan digerin. Şahidekî ku wê rojê li wir bi Eva û Ahmed re bû, ji televîzyonê re axivî. Şahidê bûyerê ragihand ku berpirsê Hêzên Ewlekariyê yên HTŞ’ê Mihemmed Abdulqani bi eşîran re ketiye têkiliyê û peymanek hatiye çêkirin. Li gorî vê peymanê, kesên li wir mayî bi awayekî ewle derbasî girtîgeha Aqtanê bûne. Lê dema ew diçûn girtîgehê, Eva û Ahmed ji aliyê hêzên HTŞ’ê ve li seyyareyeki din hatine siwarkirin. Nayê zanîn ku seyyare Eva û Ahmed lê hatine siwarkirin bi ku ve çûye. Kesê dawî yê ku Eva û Ahmed dîtine, got ku di serê hêza ku ew teslîm girtine de Mihemmed Abdulqani hebû.
Em nêzîkatiya çeteyan, bi taybetî li hemberî jinan dizanin. Wekî Jinên Komunîst ên Şoreşger, me ji bîr nekiriye: Wan tehamula cenazeyên jinên qehreman nedikir û ew ji balkonê avêtin xwarê. Me porê jinên şervan ên ku wekî “xenîmetên şer” jê kiribûn ji bîr nekiriye. Me ji bîr nekiriye ku wan guh jê dikirin û bi gotina “li pembe binêre, guhê jinê ye” nîşanî hev didan. Me ji bîr nekiriye ku wan destdirêjî kirin, jin bi hev re firotin û li bazaran bazar kirin. Me ji bîr nekiriye ku wan bêyî cudahiya ciwan û pîr, her kes qetil kirin. Ji ber vê yekê berpirsê her zerara ku bigihîje neynûka Eva Marîa, hikûmeta HTŞ’ê û Mihemmed Ebdulxani e.
Her tişt nîşanî berpirsê Hêzên Ewlekariyê yê hikûmeta cîhadîst a HTŞ’ê Mihemmed Abdulxani dide. Malbatên dîlgirtiyan bi mehan e li kolanan, hevjîn, zarok û hevalên xwe digerin. Em şirîkê êşa wan in, em li gel wan in. Em ji nêz ve şahidê wan şevên bêxew in ku bi fikarên “gelo birçî ye, gelo îşkence dibîne” derbas dibin. Em jî ji ewlehiya canê Eva û hemû dîlgirtiyan bi fikar in. Em revandokan nas dikin. Em ji vir radigihînin; Eva Marîa û Ahmed Polad we girtin, hûnê teslîm bikin. Heya ku aqûbeta dîlgirtiyan diyar bibe, em ê têkoşîna xwe bidomînin.
Em ji vir bang li saziyên navneteweyî jî dikin; heger mafên jinan û mafên mirovan ne tenê ji bo herêmeke cîhanê be, nexwe zextê li revandokan bikin ku Eva Marîa û Ahmed Polad radest bikin. Li hemberî sûcên şer çavên xwe negrin. Rê li ber rojnamevanan negrin ku rastiyê bibînin û rastiyê ragihînin. Ew komên li bin fermandariya Colanî ku hûn wekî aliyekî siyasî li ser maseyê qebûl dikin û bi çekdarkirinê piştgiriyê didinê, bila Eva Maria û Ahmed Polad berdin. Cihê wan bibêjin û wan radest bikin!
Bila esir werin berdan! Bila Eva Marîa û Ahmed Polad werin berdan! Bila Berpirsê Hêzên Ewlekariyê yên HTŞ’ê Mihemmed Abdulxanî hesab bide!”
