Hevseroka Giştî ya DEM Partiyê Tulay Hatîmogullari di komcivîna partiya xwe de diyar kir ku beriya Meclîs biçe batlaneya havînê divê çarçoveya qanûnî were rojeva Meclîsê.FILM
Hevseroka Giştî ya DEM Partiyê Tulay Hatîmogullari di komcivîna partiya xwe de li Meclîsê axivî û geşedanên di rojevê de nirxand.
Tulay Hatîmogullari anî ziman ku wê li Girtîgeha Sîncanê bi girtiyên ji doza kumpasê ya Kobanê dilgirtînê re hevdîtin pêk aniye û wiha pê de çû:
“Tevî hevalên me bi salane di girtîgehê de ne jî di têkoşînê de bi biryar in.
Hemû hevalên me yên di girtîgehê de sepanên desthilatê qebûl nakin û li dijî van sepanan berxwedana xwe didomînin.
Ayşe Gokkan ku me pê re hevdîtin kir 19 sal ceza lê hate birÎn. Em li aliyekî pêvajoyeke aştiyê bi rê ve dibin lê li aliyê din jî ceza li hevalên me dibirin.
Ev ceza û 19 sal cezayê li Ayşe Gokkan hate birîn, nayê qebûlkirin.
Em li vir bang dikin ku demildest biryarên Dadgeha Mafê Mirovan a Ewropayê pêk were û girtiyên siyasî bên berdan.”
Tulay Hatîmogullari: Sedema birçîbûn û xizaniyê desthilata AKP ê ye
Tulay Hatîmogullari bal kişand ser geşedanên li herêmê û axaftina xwe wiha domand:
“Welatî bi birçîbûnê re rû bi rû ne.
Ji ber kêmbûna muçeya teqawîdbûnê kesên teqawîd nikarin debara xwe bikin.
Sedema birçîbûn û xizaniyê polîtîkayên desthilata AKPê ye.
Parlamenterên desthilatê dengên sextê di Meclîsê de bikar tînin.
Yên dengên sextê bikar tînin dê çawa ji daxwazên gel dabîn bikin û pêk bînin.
Em weke DEM Partiyê xizmetên fermî bê pere û bi zimanê dayikê pêşniyar dikin.
Em ê li dijî xizanî û betaliyê jî bi hemû ciwanan re têkoşîna xwe bidomînin.”
Tulay Hatîmogullari: Ya ku muzakereyê xurt dike têkoşîn e
Tulay Hatîmogullari derbarê pêvajoya Aştî û Civaka Demokratîk de jî ev nirxandin kirin:
“Di serdemeke ku li herêmê şer û pêvçûn heye de divê Tirkiye pêşengiya aştiyeke demokratîk bike.
Li herêmê gel ji me re dibêje; ‘PKKê çekên xwe şewitandin lê Tirkiyeyê tu gav neavetin’.
Ji me dipirsin dibêjin, ‘Gelo dewlet pevçûne dixwaze an?’ Ev ne pirsa me ye pirsa gel e.
Ev pêvajo bi gotinan nabe. Divê çarçoveya qanûnî demildest bê rojeva Meclîsê.
Mafê kesî tune ye hêviyên gel ên aştiyê bişkîne.
Li cihekî ku çek bêdeng bûbûn divê çarçoveya qanûnî bingeha demokrasî û hiqûqê xurt bike.
Weke DEM Partiyê em her tim dibêjin aştî û girîngiya aştiyê tînin ziman.
Em di vê ferqê de ne û xebatên vê yekê didomînin. Ya ku muzakereyê xurt dike têkoşîn e.”
