Xwediyên erdên çandiniyê yên herêma Aliyan a Çilaxayê erdên xwe yên çandiniyê ku di dema Baasê de desteser kiribûn, dixwazin û dibêjin bila ‘Biryarnameya 93’ betal bibe.
Xwediyên erdan ên herêma Aliyan a Çilaxayê ya herêma Cizîrê, dixwazin ku erdên wan ên di dema rejîma Baasê de desteser kirine li wan vegerînin û dibêjin piştî lêkirina Bendava Firatê malbat ji Tebqa û Reqayê bi navê `Gemer` derbasî Cizîrê bûn.
Herêma Aliyan bi axa ya berhemdar tê naskirin û ji çandiniyê re baş e. Her wiha herêmê herî zêde ji Kembera Erebî ziyan dît. Şêniyên herêma Aliyan dibêjin bi sedan hektar erdên çandiniyê ji gundiyên 14 gundan (Kêşik, Aleqosê, Gundikê Şelal, Sêgirka, Mûsa Kor, Nebî Sadî, Etbê, Qastaban, Xerab Reş, Qaşto, Dêrna Gulinka, Tokil, Maşûqê, Kil Hesenakê û Girdêm) standin.
Îbrahîm Derwîş (65) ê ji gundê Tokile got piştî projeya Kembera Erebî, 30 hektar erdî wî desteser kirine û ev lê zêde kir: “Welatîbûna Sûriyeyê ji min girtin û ev yekê aliyê civakî û aborî ve bandoreke neyînî li ser jiyana min kir. Ez neçar mam koçber bibin. Belge di destê min de nebûn ku ez Sûriyeyî me ji ber vê yekê me daxwaza mafên xwe nekir. Di vê pêvajoyê de pêwîste erdên me li me vegerînin û hemû qanûnên têkildarî Kembera Erebî derketine, betal bikin.”
Cemal Şêxî yê ji gundê Kêşik diyar kir ku di projeya Kembera Erebî de 15 hektar erdê wî jê standine û wiha pê de çû: “Welatîbûn û erdên gelê Kurd ji wan standin û berê wan dan koçberiyê. Dibe ku sîstema Baas hilweşiya lê hîna erdên gelê Kurd li wan venegerandine. Em bang dikin ku destûrekî nû yê Sûriyeyê çêbibe û mafên xelkê lê vegerînin.”
Basil Derwîş anî ziman ku ew yek ji kesên ku erdên wan jê standine û wiha got: “13 hektar erdên min desteser kirin. Em mafên xwe dixwazin û ew biryarnameya ku erdên me dan Gemer dibe ku betal bibe. Divê di çarçoveya qanûn û destûrê de mafên me bidin me, edalet pêk were û wekhev nêzî hemû sûriyeyiyan bibin.”Projeya Kembera Erebî ji aliyê serbazê nîjadperest Mihemed Teleb Hîlal ve hatibû çêkirin. Di çarçoveya projeyê de li herêma `Xeta Deh` a li ser sînorê Bakurê Kurdistanê malbatên Gemer (Yên malên wan di bin avê de mabûn) bi cih kirin û erdên Kurdan dane wan. Bi projeya Kembera Erebî dixwestin demografiya herêma Cizîrê biguherînin û erdên Kurdan desteser bikin. Gelê Kurd niha daxwaza mafên xwe dike.
