Endama Desteya Rêveberiya Navendî ya Komeleya Mafên Mirovan (ÎHD) Eren Keskîn destnîşan kir ku divê mercên jiyanê û kar ên azad ji bo Rêber Apo bêne afirandin û got:
“Astengkirina hevdîtina bi parêzeran re ya kesekî ku weke muzakerevanê sereke tê qebûlkirin, yek ji astengiyên herî mezin ên li pêşiya pêvajoyê ye.”
Di ‘Pêvajoya Aştî û Civaka Demokratîk’ de bal li ser gavên desthilatdariyê ye ku di mijara sererastkirinên hiqûqû û siyasî de biavêje.
Endama Desteya Rêveberiya Navendî ya Komeleya Mafên Mirovan (ÎHD) Eren Keskîn aliyê hiqûqî yê pêvajoyê û rola Rêber Apo nirxand.
Eren Keskîn ragihand ku pêvajoya aştiyê gihîştiye qonaxeke girîng, lê belê hîn jî dewletê gavên jê tê hêvîkirin neavêtiye û got:
“Beriya her tiştî li cografya Kurdistanê pêvajoyeke nû ya aştiyê destpê kir.
Gavên şênber ên ku heta niha dewletê avêtiye, ji bilî komîsyonê me nedîtiye.
Li beramberî vê yekê aliyê Kurd gaveke gelekî dîrokî û girîng avêt.
Lewma guheritna mercên heyî yê aktorê sereke yê pêvajoyê êdî pêwîstiyeke ku nabe bê taloqkirin.”
“Nayê qebûlkirin ku hevdîtina muzakerevanê sereke ya bi parêzerên xwe re bê astengkirin”
Eren Keskîn destnîşan kir ku ji bo hevdîtinên aştiyê bi rengekî çêker bi pêş ve biçe divê alî xwedî mercên wekhev be û ev tişt anî ziman:
“Ji bo Birêz Ocalan karibe hevdîtinan bimeşîne beriya her tiştî divê azad be.
Birêz Ocalan karibe bi rengekî azad biaxive, bi rengekî azad lê bê guhdarîkirin û danûstandinan bike.
Astengkirina hevdîtina muzakerevanê sereke ya bi parêzeran re, astengkirina têkiliya wî ya bi cîhana derve re ne li gorî ruhê pêvajoya muzakereyê ye.”
“Statu tê wateya garantiya hiqûqî”
Eren Keskîn bal kişand ser statuya Rêber Apo û got:
“Rastiya gelekî heye ku hatiye parçekirin û li çar parçeyan ji mafên xwe yên bingehîn hatiye înkarkirin.
Ev gel îro daxwaza statuyê dike.
Di vir de mebest ji statuyê ew e ku garantiyên hiqûqî yên mekanîzmaya ku gel temsîl bike û hevdîtinan bimeşîne bê avakirin.
Bêguman binavkirina vê yekê di encama hevdîtinên bi Birêz Ocalan re dikare bê diyarkirin.
Koordînatorî dibe, yan jî navekî din dibe; ya girîng sererastkirina ku garantiya hiqûqî pêk bîne.”
