Ji bo demek nêz di asoya Rojhilata Navîn de aramî xuya nake.
Amerîka careke din bi dijwarî êrişî Îranê kir.
Tehranê jî bang li sivîlên li Rojhilata Navîn kir ku bi 500 metreyî xwe ji baregehên Amerîka dûr bixin.
Hemwextî vê Serokê DYA Trump got:
Keştiyên ji ber êrişên Îranê ziyan dîtî wê ji pereyê Tehranê ziyana wan bê dayîn.
Di wextekî rewş wiha de hêviyên gihiştina agibestekê ji her diçe kêmtir dibe.
Êrişên nû û gurbûna şer bîlançûya qurbaniyan zêde dike.
Îran dibêje ji despêka Tîrmehê ve di êrişên Amerîkayê de 55 kes hatine kuştin û 600 kes jî birîndar bûne.
Li gelek bajarên welêt, di nav de Bender Ebas, Ehwaz, Omîdiyê û derdora Xuzistanê, dengên teqînan hatin bihîstin.
Îranê gef xwar: Xwe 500 metre ji baragehên Amerîka dûr bixin
Li pêşberî van êrişan ji Tehranê gefek nû hat.
Supay Pasdarên Îranê bang li sivîlên li derdora navendên leşkerî yên Amerîka yên li Rojhilata Navîn e ku herî kêm bi 500 metreyî xwe ji van nuqteyan dûr bixin.
Her wiha diyar kirin ku di çarçoveya bersivdana êrişên Amerîkayê de wan li navenda daneyan a Amazonê ya li Bahreynê xistiye û bêkêr kiri ye.
Îranê îdîa kir ku navenda daneyan a navborî ji bo komkirina îstîxbaratê ji artêşa DYE’yê re roleke girîng dilîst.
Washington pereyê cemidandî dixwaze
Serokê DYA’yê Donald Trump ragihand ku pereyên cemidandî yên Îranê yên di bin kontrola Amerîkayê de dê ji bo tezmînata zirarên keştiyan û barên wan werin bikaranîn.
Wezîrê Derve yê Îranê Ebas Eraqçî jî dibêje ev yek bi ti awayî nayê pejirandin.
Fermandariya Navendî ya Amerîkayê CENTCOM ragihand ku wan careke din bi xurtî li xalên leşkerî yên Îranê xistiye.
Washington dibêje armanc lawazkirina kapasîteya gefa li ser deryavanîya sivîl e.
Di heman demê de, piştî êrişên Hûsiyan li Deryaya Sor, aloziya li Tengava Hurmizê zêde bû.
Nirxê bermîla petrolê dîsa ji 100 dolarî derbas bû.
Li gorî Reutersê, di 24’ê Tîrmehê de tenê keştiyek petrolê kariye ji Tengava Hurmuzê derbas bibe.
Ev daneya herî kêm ya ji meha Gulanê ve ye.
Hemwextî van rewşan nûçeyk balkêş ji New York Times hat belavkirin.
Li gorî agahiyên wê ku dispêre çavkaniyek taybet bi Serokê DYA Trump ji bo agirbestê bi Serokwezîrê Iraqê re peyamek şandiye Tehranê.
Lê ev peyam ji aliyê Îranê ve hatiye redkirin.
Her çiqas rêveberiya Bexda vê yekê red dike jî Washington û Tehran li ser vê yekê bêdeng in.
