Vîrûs hîna bi xurtî li beşên din yên Kurdistanê û welatên herêmê jî belav dibe.
Li Iraq, Îran û Tirkiyê bîlançoya qurbaniyan giran dibe.
Ji bo berdana girtiyan jî bang hat kirin.
Vîrûsa corona hîna jî şaxên xwe li Kurdistan û welatên herêmê, berfireh dike û giyanên nû bi xwe re dibe.
Wezareta Tenduristiyê ya Iraqê di daxuyaniya xwe ya rojane de diyar kir ku jimara kesên bi vîrûsê jiyana xwe ji dest dane, derket 40’î û 76 kes jî bi vîrûsê ketin.
Wezaretê da zanîn ku jimara gitşît ya kesên bi vîrûsê ketine bû 458 kes û ya kesên ku baş bûne jî bû, 122.
Li Başûrê Kurdistanê 9 kes nû bi vîrûsê ketin
Wezareta Tenduristiyê ya Herêma Başûrê Kurdistanê jî ragihand ku di nava 24 saetên borî de 9 kesên din li Hewlêr û Dihokê bi vîrûsê ketine.
Malbatên gitiyên Mexmûrê: Bila Tirkiye girtiyan berde
Li Wargeha Penaberan a Mexmûrê JÎ malbatên girtiyên ku di zîndanên dewleta Tirk de ne, ji bo balê bikişînin li ser metersiya vîrûsa corona bi daxuyaniyekê bang li CPT kirin ku di vê mijarê de bi erka xwe rabe û gotin:
Banga me ew e ku beriya vîrûs derbasî zindanan bibe û komkujî pêk werin pêwîste hemû zindanî serbest bên berdan.
Leyla Guven: Ambargoya li ser Mexmûrê rakin
Hevseroka KCD’ê Leyla Guven jî ji bo ambargoya li ser wargeha Mexmûrê bang li serokê Herêma Başûrê Kurdistanê Nêçîrvan Barzanî û serokwezîrê Hikumeta Herêma Başûrê Kurdistanê Mesrûr Barzanî kir û xwest ku di van rojên herî dijwar ên vîrûsê de ambargoya li ser Mexmûrê rakin.
Meclîsa Gel a Mexmûrê jî ji Rêveberiya Xweser a Bakur û Rojhilatê Sûriyeyê re nameyek şand û li dijî vîrûsa coronayê, alîkarî xwest.
Li Tirkiyê 16 kesên din mirin
Bîlançoya qurbaniyên corona roj bi roj li Tirkiyê giran dibe
Di 24 saetên dawî de, 16 kesên din bi vîrûsê mirin û jimara giştî bû 75 kes.
Her wiha jimara kesên ku bi vîrûsê ketine jî bû 3 hezar û 629 kes.
Li Bakurê Kurdistanê jî vîrûs hatiye dîtin.
Li Amedê, kesekî 49 salî ku bi vîrûsê ketî, jiyana xwe ji dest da.
Li Egeyê, 269 girtiyên nexweş bi metirsiya Corona re, rû bi rû ne
Li gorî daneyen Komeleya Mafê Mirov a ÎHD’ê ya Îzmirê li girtîgehên Herêma Egeyê 269 girtiyên nexweş hene.
Ji ber ku herî zêde vîrûs bandorê li ser nexweşan dike girtiyên nexweş bi talûkeyek mezin re rû bi rû ne.
Bîlançoya li Îranê giran dibe, 144 kes mirin
Roj bi roj hejmara kesên li Îran û rojhilatê Kurdistanê bi vîrûsa Coronayê dimirin, zêde dibe.
Wezareta Tenduristiyê ya Îranê ragihand ku di nava 24 saetên dawî de 144 kesên din bi vîrûsê mirin.
Hat gotin di nava 24 saetên borî de 2 hezar û 926 kesên din bi vîrûsê ketin û jimara gihîşt 32 hezar û 332 kesan.
Bi vê re jimara giştî ya qurbaniyan bû 2 hezar û 378 kesan.
Li gorî wezaretê, 11 hezar û 133 nexweş jî baş bûne.
