Ji ber qedexeya derketinê kolan vala bûne, lê gel dibêjin ku 2 roj têrî tinekirina vîrûsê nakin. Her wiha ji bo berdana girtiyan jî bang tên kirin.
Bîlançoya qurbaniyan li Tirkiyê giran e
Dewleta Tirk ku ji destpêka derketina vîrûsê de, bi xemsarî tevdigeriya, niha temenê vê yekê dide.
Li gorî daneyên dewleta Tirk 52 hezar û 167 kes bi vîrûsê ketine û hezar û 101 kes jî mirine.
Li Êlihê tedbîr hatin girtin
Vîrûs li Bakurê Kurdistanê jî belav bûye.
Li Amedê jineke 83 salî mir û nexweşek û xebatkarekî tenduristiyê ji ber ku bêyî amûrên parastinê mudaxaleyî kesekî ku piştî mirinê testa wî pozîtîf derketiye kirine, bi vîrûsê ketine.
Walîtiya Êlihê, ji bo pêşîgirtina belavbûna vîrûsê, ketin û derketina hemû parkan ji welatiyan re qedexe kir.
Welatiyên Amedê: Qedexeya 2 rojan vîrûsê tine nake
Dewleta Tirk ku dereng dest bi girtina tedbîran kir, 10’ê Nîsanê nîvê şevê ji nişkêve qedexeya derketinê ya ji bo 2 rojan li 31 bajarên Tirkiyê û Bakurê Kurdistanê, ragihand.
Vê yekê hişt ku welatî ji bo peydakrina pêdiviyên xwe bi yek carê re derkevin, bazarê û ji ber kombûna metirsiya belavbûna vîrûsê zêdetir bû.
Ev qedexe îro nîvê şevê bi dawî dibe.
Li Amedê ku yek ji bajarên mezin ên Kurdistanê ye ji ber qedexeyê kolan vala bûn.
Ji bilî dermanfiroşên nobedar û hin firinan, dikan hemû girtî bûn.
Gelê Amedê nerazîbûn nîşanî dema ragihandina biryarê da û got:
“Bêyî ku bihêlin em xwe amade bikin, qedexe ragihandin.
Qedexeya 2 rojan têrê nake ku vîrûsê tune bibe”.
Li gelek deverên Amedê yên ku qelebalix bûn, bêdengiyeke ku kêmcaran hate dîtin hebû.
Kolanên Stenbolê ji rêwiyan vala ne
Her wiha ji ber raghandin qedexeyê li Stenbolê jî bêdengiyek hebû.
Di van dîmenan de diyar dibe ku çawa kolan û deverên bajar ên ku herî zêde qerebalix in, vala bûne.
“Li dijî vîrûsê tedbîr negirtine û ewlehiya me ya can tine ye”
Yek ji deverên ku herî zêde metirsî li ser heye, girtîgeh in
Ayhan Yilmaz ê ku di Girtîgeha Tîpa T a Wanê de ye diyar kir ku gardiyanan êrîşî wan kirine û ewlehiya wan a can tune û li dijî vîrûsê ti tedbîr nehatin girtin.
Girtiyan, ji girtîgeha tîpa “T” a Rihayê banga serbestberdanê kir
Girtî bixwe jî banga xwedîderketin û sebestberdanê dikin.
Ji Girtîgeha Tîpa T a Rihayê, girtiyan bang li parazvanên mafên mirovan kir û diyar kirin ku ew ji mirinê re hatine hiştin.
Girtî Kasim Karataş ê 29 sal in li vê girtîgehê ye, diyar kir ku “di vê pêvajoya metirsîdar de, ji bo parasina wan ti tedbîr nehatine girtin”.
Feleknas Uca: Dixwazin girtîgehan bikin goristanên komî
Parlamentera HDP’ê ya Êlihê Feleknas Uca, diyar kir ku AKP-MHP’ê dixwazin bi zagona înfazê girtîgehan bikin goristanên komî û got:
“Divê di serî de Rêber Abdullah Ocalan, hemû girtiyên siyasî bên berdan.”
Federasyona Komeleyên Hiqûqî û Piştevaniyê ya Malbatên Girtiyan a Medê jî, ji rêxistinên mafên mirovan û hiqûqê yên neteweyî û navneteweyi xwestin ku guh bidin dengê wan.
