Ji bo hevalên xwe timî kir û ked da. Bû fedayiya jiyanê. Ji ber ku rastî jî xwedî kesayeteke wisa bû. Li kû derê têkoşîn hebû, ked hebû ew li wir bû. Bi hevaltiya wê mirov dilsoziya wê ya bi Rêbertî re didît. Em behsa yek ji fermandar Gerîla Jinda Ozgur dikin.
Di dîroka jinê de, navê gelek qehremanên jin, mîna Zîlan, Bêrîtan û Viyan hatin bihîstin.
Yek ji hevrê û şopdarên xeta wan jî, ji fermandarên YJA-STAR’ê Jînda Ozgur e.
Jînda Ozgur di jiyana xwe ya gerîlatiyê ya 20 salan de, li her derê Kurdistanê li pey xwe gavên azadiyê hiştine.
Her kêliya xwe ya jiyanê bi felsefeya azadiyê ya Rêber Ocalan jiya û heya dawî jî dev ji rêya fedaîtî berneda.
Gerîla Jînda Ozgur dema serpêhatiya xwe ya jiyanê û têkoşînê tîne ziman, dibêje:
Çalakiya fedayî ya ku heval Rehşan li Îzmîrê pêk anî, bandoreke mezin li min kir.
Mirovek çawa dikare ji bo Rêber û partiya xwe, di heman demê de ji bo gelê xwe canê xwe bide ber agir. Çalakiya Ş. Rehşan hişt ku werim girêdan.
Ji bo gelê Kurd yek ji xeyalên herî mezin, dîtina Serokatî ye.
Min bi xwe jî Serokatî ji bo xwe wek her tiştî didît: Ez çûm qada Serokatî.
Min bi baldarî ew dişopand. Tişta ku min xeyal dikir pêk hatiye.
Serokatî ji fizîka me bigre, heya pêşketina me ya birdozî bi her tiştê ve mijûl dibû.
Li gel Serokatî mirov di her kêliyê de hestên azad hîs dike.
Fermandar Jînda li eyaleta Xarzanê, 21’ê Adara 2017’an, roja Newrozê, di şopa Mazlûman de, şehîd bû.
Sozdar Avesta: Jîndar hevrêya azadiyê bû
Endama Konseya Serokatiya Giştî ya KCK’ê Sozdar Avesta ku yek ji hevala Jînda ya xeta azadiyê ye wiha dibêje:
Hevrê Jînda li Botanê û qadên parastina Medyayê gerîlatî kir.
Bi sekn û hevaltiya xwe di nava jiyanê de, hişt ku hevrêyên wê ji Serokatî re behs bikin.
Jînda bi çûyîna xwe û naskirina Serokatî encam derxistibû. Bi vê xûrtbûyîna xwe ve, di rêveberiyê de cih girt. Bi sedan hevalên ku Jînda perwerde kirine hene.
Em jî wek hevrêyên wan di xeta wan de ne, yên ku bûn xeta dîrokî û gihîştin asta şahadetê.
Emê xeyalên wan pêk bînin.
Erkê dikeve ser milê me, misogerkirina azadiya Serokatî ye.
