Li Hesekê vîrûsa Corona heye, taxek di bin çavdêriyê de ye û dewleta tirk jî avê qut dike. Rêveberiya Avê ya Hesekê jî dibêje, ji ber gefên dewleta tirk ew nikarin herin stasyona Elokê û pirsgirêkê çareser bikin. Her çiqasî rêxistinên NY jî bang li dewleta tirk kiribû ku dest ji van kiryarên xwe berde jî lê ev kiryar dewam dikin.
Dewleta Tirk a dagîrker ku beşek ji xaka bakurê Sûrî dagir kiriye, di pêkanîna sûcên xwe yên şer de bi israre.
Dewleta Tirk, hemû pîvanên navnetewî binpê dike û şerekî qirêj li dijî gelê herêmê dike.
Di demekî de ku hemû cîhan bi Corona û cîhana mislman bi rojiye, dewleta Tirk a dagirker ji bo cara 6’an ava stasyona Elok ku avê dide nêzî milyonek şêniyên kantona Hesekê qut kiriye.
Tevî van hemûyan jî li Hesekê li ser 2 kesan vîrûs hat dîtin û taxa El Omran ya bajar jî ketiye bin karantînayê.
Di demeke wisan de ku pêwistiya bi avê hîn zêdetir bûye, dewleta tirk dîsan avê qut dike.
Rêveberiya Avê ya Hesekê diyar kir ku av ji stasyona Elok hatiye qutkirin û xebatkar nikarin herin stasyonê.
18’ê Cotmeha borî, NY di raporeke xwe de anîbû ziman ku Elok di bin bomebarana dewleta Tirk dûrî xizmetê ket.
Her wiha NY û xebatkarên saziyên mirovahiyê, bang li aliyên peywendîdar kirin ku her divê stasyon di xizmetê de bimîne.
Fona Alîkariya Zarokan a Neteweyên Yekbûyî (UNICEF) jî li ser mijarê daxuyaniyek dabû û gotibû qutkirina avê zarok û malbatên wan dixe xeteriyek ku nayê qebûlkirin.
31’ê Adara borî jî Rêxistina navdewletî ya Rêxistina Çavdêriya Mafê Mirovan bang li dewleta Tirk a dagirker kir ku avê nema li ser herêmên Bakur û Rojhilatê Sûrî qut bike û stasyona Elokê ranewestîne.
Rêxistinê wê demê teqez kiribû ku di wextekî de metirsiya belavbûna vîrûsê li herêmê li dar e, Tirkiyê bi qutkirina avê rê li ber xebat û rêkarên li dijî vîrûsê digire.
Malpera El-Monîtor jî derbarê heman mijar de rapore bi navê Çeteyên dewleta tirk bi “çeka avê” li dijî kurdan şer dikin belav kiribû.
Lê tevî van hemûyan jî dewleta tirk di pêkanîna sûcên xwe yên şer de bi israre.
Û niha careke din çavê şêniyan li benda hatina avê ye.
