Rêxistina civakî ya sivîl a bi navê Plan Înternatîonal ragihand, hejmara bûyerên sinetkirina jinan zêde bûye. bi tayîbet li Somalê di 2020’an de 290 hezar zarok hatin sinetkirin
Li Somaliyê ku jin lê tên sinetkirin, di vê dema vîrûsa koronayê de ku mirov li malê tên hiştin, jinên temen mezin li nava malan digerin û zarokên keç sinet dikin.
Krîza Covîd-19 li Somaliyê li pêşiya bidawîkirina sinetkirina jinê asteng e.
Rêxistina civakî ya sivîl a bi navê Plan Înternatîonal ragihand, hefteyên dawî li Somaliyê sinetkirina jinan gelekî zêde bûye.
Jina bi navê Sadîa Allîn ku mexdûreke sinetkirina jinan e û bi salane li dijî vê yekê têdikoşe, diyar kir ku ew li hin jinan rast tê ku li nava malan digere û dixwaze qaşo ‘xizmeta sinetkirina jinan’ bidin.
Li gorî raporeke ÛNÎCEF’ê, li Somaliyê 98 ji sedî yê jinan hatine sinetkirin.
Ji bo bidawîkirina êşkenceya sinetkirina jinan rêxistinên civakî gelekî hewl didin.
Lê belê di vê dema şewbê de hejmara bûyerên sinetkirinê gelekî zêde bûye.
Girtina dibistanan û mayina zarokan a li malê ji aliyê dê û bavê wan ve weke firsendekê tê dîtin û dikin ku ev hovîtî li zarokên wan bê kirin.
Tevî ku sinetkirina jinan bi peymanên navneteweyî hatiye qedexekirin, li Somaliyê rewa ye.
Fona Nifûsê ya Neteweyên Yekbûyî ragihand ku di sala 2020’an de 290 hezar keç hatine sinetkirin.
Li hin welatên Efrîkayê sinet ji aliyê qanûnî ve hatiye qedexekirin, lewma li vê parzemînê rêjeya giştî ya sinetkirina jinê kêm dibe.
