Fermandariya Giştî ya Yekîneyên Parastina Jin (YPJ), şehîd Bêrîvan û şehîd Silava bi bîr anîn û da zanîn ku ewê bi dildariya wan tevbigerin û bi rihê wan ê fedaîyana hemû jinan, gelê xwe û welatê xwe biparêzin.
Fermandariya Giştî ya Yekîneyên Parastina Jinê (YPJ) bi boneya salvegera şehadeta şehîd Bêrîvan û şehîd Silava peyamek weşand:
YPJ’ê destpêka peyama xwe de herdu şehîd bi bîr anîn û ev tişt gotin:
“Em di şexsê her 2 hevrêyên xwe Bêrîvan û Silava de, tevahî şehîdên ku di oxira azadiyê de canê xwe bexşandine, bi rêzdarî bi bîr tînin û soza tolhildanê careke din li beramberî lehengiya wan nû dikin.
YPJ’ê bal kişand ser berxwedana jinan di a dirêjiya dîrokê de û wiha domand:
“Di her sedsalê de bi sedan jin derketin û serî li hember pergalên desthiladar, dagirker rakirin.
Lewra di hemû êrîşên qirkirin û dagirkeriyê de destpêkê jin bûn hedef.
Di roja îro de di şexsê dewleta Tirk a dagirker û çeteyên wê de dîroka destdirêjî û qirkirinê careke din xwe dûbare dike.
Ev hêzên çete bi hovîtiya xwe xwestin careke din deriyê tarîtiyê li jinê vekin, civak û welatê wan dagir bikin.
Lê di tekoşîn û meşa azadiya jinê de, bi taybetî jî di şoreşa Rojava de jinê pêşengiya şoreşê hilgirte ser milê xwe.”
YPJ’ê diyar kir ku Silava û Bêrîvan canê xwe kirin mertal û wiha domand:
“Rêhevalên me Silava û Bêrîvan, zarokên çiyayê Kurmênc bûn yekem bedel, yekem şehîdên YPJ’ê.
Di şexsê şehîd Silava û şehîd Bêrîvan de sala 2012-2013’an bû sala herikandina jinên Rojavayî ya nava refên şoreşê.
Her 2 hevrêyên me jî ev xeterî ferq kiribûn û di eniyên şer ên herî pêşde canê xwe kiribûn mertal.
Ji bo destê çeteyan nêzî ax û welat nebe, heta dawî bi erk û berpisyariyeke mezin kar û xebat meşandin.
Li ser şopa wan bi sedan Bêrîvan û Silava herikîn nava refên şoreşê û me jî weke YPJ, wê rojê soz da Silava û Bêrîvan ku emê artêşbûna xwe hîn mezintir bikin û tekoşîna xwe xurtir bikin.
YPJ’ê dawiyê ji bo parastina destkeftiyên Şoreşa Rojava û dawîkirina dagirkeriyê, soza xwe nû kir û diyar kir ku ewê bi dildariya wan şehîdan tev bigerin, bi ruhê wan ê fedaîyane hemû jinan, gelê xwe û welatê xwe biparêzin.
