Piştî pêkanîna Qanûna Qeyser, Amerîka ceza li 39 kes û saziyan birîn, di nav de xwişk û birayê Beşar Esed jî hene. Wezîrê Derve yê Amerîkayê Mike Pompeo û Nûnerê Amerîkayê yê Sûriyê James Jeffrey jî dan zanîn ku eger çi dewlet cezayên li ser Sûriyê binpê bike, wê ceza li wê jî bê birîn. Hikûmeta Şamê jî ev ceza red kir û ew weke binpêkirina qanûnên navneteweyî bi nav kir.
Piştî sepandina Qanûna Cezayan a bi navê Qeyser, Amerîka dest bi kampanya fişara siyasî û aborî ya li ser hikûmeta Şamê kir.
Di çarçoveya qanûnê de, Serokê Hikûmeta Şamê Beşar Esed û hevjîna wî jî di nav de, li dijî 39 kes û saziyan “kampanya fişara siyasî û aborî” dest pê kir.
Bi daxuyaniyeke hevbeş a Wezareta Derve û Wezareta Xezîneyê yên Amerîkayê, navê kes û saziyên ceza li wan hatine birîn wiha ne:
Mihemed Himşo
Firqeya Fatimiyûn a Pasdarên Îranê
Mahir Esed.
Fermandarên Firqeya 4’an Xesan Elî Bîlal û Samir El-dan.
Her wiha Xwişka Beşar, Bişra Esed.
Menal hevjîna Mahir Esed û jimareke kesayetên din ên Sûrî..
Piştî vê yekê, Fransayê biryar da ku apê Beşar, Rifet Esed 4 salan bigirin û dest deyînin ser mal û milkên wî.
Beriya niha jî hikumeta Fransayê doz li Rifet Esed vekiribû.
Li gorî daxuyaniya Wezîrê Derve yê Amerîkayê Mike Pompeo, rêkarên Qanûna Qeyser, duh bi temamî ketine meriyetê.
Pompeo: Kî bi Esed re kar bike, wê ceza li wan jî bê birîn
Pompeo di daxuyaniyê de dibêje:
“Kî bi rejîma Esed re kar bike, li ku dibe wê liv û tevgera wan bê astengkirin û cezayên darayî li wan bên sepandin.”
Pompeo destnîşan kir ku wan gelek rêkar danîne pêşiya xwe, heta ku Esed û rejîma xwe dest ji şerê tund li dijî gelê Sûriyê bernedin û çareseriyeke siyasî qebûl neke, ew ê ranewestin.
Jeffrey: Wê qonaxek din a cezayan li dijî hikumeta Şamê hebe
Li gorî Nûnerê Amerîkayê yê ji bo Sûriyê James Jeffrey jî, wê qonaxeke din a cezayan li dijî hikumeta Şamê hebe.
Jeffrey got:
“Çi dewleta ku cezayên Sûriyê binpê bike, yan mêvantiya malbata Esed bike, wê were cezakirin.
Em peyaman ji Esed re naşînin, em bi Rûsyayê re kar dikin da ku biryara Konseya Ewlekariyê ya 2254’an pêk bînin”.
Nûnerê Amerîkayê her wiha hêvî kir ku “ew bigihêjin çareseriyekê ji bo ku alîkariyên mirovî derbasî herêmên Bakur û Rojhilatê Sûriyê bibin”.
Hikumeta Şamê jî bêbersiv nema û diyar kir ku “Amerîka bi van cezayan, qanûnên navneteweyî binpê dike.”
