Li gel hewldanên çareseriyê, dewleta Tirk hîna çeteyan dişîne Lîbyayê û herî dawî 129 çete derbasî Misratayê kirin. Amerîka jî banga agirbesteke lezgîn li hemû aliyên şer ên Lîbyayê kir û teqez kir ku nabe bi ti awayî şer ji nû ve li wir gur bibe. Di heman çarçoveyê de jî, dihat payîn îro Komkara Welatên Ereb ji bo Lîbyayê bicive, lê ji ber sedemine teknîkî, civîn bo sibe hat bipaşxistin.
Li gel bilindbûna asta tengijînê di navbera Qahîra û Terablusê de, dewleta Tirk hîna çek û çeteyên xwe diherikîne Lîbyayê..
Çavkaniyek ji balafirgeha Misratayê ragihand ku duh êvarî 129 çete bi balafireke Tirkî gihaştin Lîbyayê.
Amerîka banga agirbesteke lezgîn kir
Ji bo şerê li ser erdê û sarkirina van tengijînan, Konseya Netewî ya Amerîkî banga agirbestekê lezgîn li hemû aliyên şer ên Lîbyayê kir.
Konseya Amerîkî her wiha banga berdewamkirina danûstandinên Lîbî-Lîbî kir û li ser hesabê xwe yê twitterê ev tişt nivîsand:
“Nabe bi ti awayî û ji çi aliyî, şerekî din li Lîbyayê gur bibe”..
Komkara Welatên Ereb sibe ji bo Lîbyayê dicive
Ji bo insyatîfa Qahîrayê ya herî dawî ku ji bo çareserkirina aloziya Lîbyayê dabû destpêkirin.. dihat payîn Komkara Welatên Ereb îro bicivya, lê ji ber sedemine teknîkî, civîn bo sibe hat bipaşxistin.
Ev civîn li ser daxwaza hikumeta Misirê dê were lidarxistin.
Lê Hikûmeta Wîfaqê ya Ixwanî, lidarxistina vê civînê û egeriya destwedana Misirê di xaka Lîbyayê de red kirin û ev yek weke ragihandina şer e bi nav kir.
Şemiyê, hikumeta Qahîrayê egeriya “destwerdana leşkerî ya yekser li Lîbyayê” li ba kir, ew jî eger dewleta Tirk ber bajarê Sêrt ve biçe û destê xwe deyîne ser..
Her wiha çavkaniyên Lîbî eşkere kir ku Parlemantoya Lîbyayê wê di rojên bê de civîneke awarte li dar bixe, da ku ji Misirê bixwaze li dijî destwerdana Tirkiyê destwerdanê bike.
Aliyên Erebî û navdewleltî jî piştiriya xwe ji bo hewldanên Misirê destnîşan kir.
Di nav de Amerîka, Yûnanistan, Siûdiyê, Îmarat û Behrên.
Artêşa Niştimanî qedexeya firîna balafiran li ser bajarê Sêrtê ragihand
Duh jî, Berdevkê Artêşa Niştimanî ya Lîbyayê, Ehmed El-Mismarî qedexeya firîna balafiran li ser bajarê Sêrtê ragihand.
Mismarî got:
Çi armancek di cihê qedexeyê de xuya bike, em ê bersiva yekser bidinê.
Li ser helwestên dawî yên Misirê jî, Mismarî anî ziman ku:
Helwestên Misirê dide xuyakirin ku şerê wan, şerekî netewî ye û rola Misirê ji bo çareseriyê girîng e.
