Li ser destûra bingehîn a Sûrî wê di 24’ê Tebaxê de li Cenevê hevdîtin dest pê bikin.
Nûnerê Taybet ê Amerîkayê, Ceyms Cefrî beriya hevîditên li Cenevê, li ser mijarê axivî..
Cefrî îdîa kir ku wê beşdarên civînê ji her devera Sûrî bên hilbijartin.
Lê belê Cefrî têkildarî nûneriya gelên li Bakur û Rojhilatê Sûrî ti helwesteke zelal nîşan neda..
Ji Viyanayê bigrin heta Cenêv, Astana, Soçî, Riyad û Qahîreyê, bi salane di bin navê çareserkirina aloziya li Sûrî bi dehan civînên navneteweyî hatin lidarxistin..
9 sal di ser van hewldanan re derbas bûn lê heta niha ji bo çareseriyê ti gaveke ber bi çav nehatiye avêtin..
Sedem jî ew e ku ji gel û hêzên li Sûrî bêhtir, yên cihê xwe di nav civînan de digrin hêzên derve ne..
Aliyên ku li ser navên opozîsyona Sûrî beşdar dibin jî heta niha ji bilî wêranî, talan û kuştinê tiştekî din nekirine para gelan..
Ev hêzên ku niha Efrîn, Serêkaniyê, Girê Spî, Ezaz, Cerablûs û Babê dagirkirine, li bin sîwana dewleta Tirk weke aliyekî hevdîtinan têne qebûlkirin..
Tişta balkêş ew e ku hêzên mîna Amerîka, Rûsya û hin welatên Ewrûpayê jî destekê didin beşdarbûna van koman..
Li aliyê din, Rêveberiya Xweser a ku nûneriya bêtirî 4 mîlyon kesan dike li derveyî vê pêvajoyê tê hiştin..
Û niha plan tê kirin ku heman tişr ji bo hevdîtinên “destûra bingehîn” jî were kirin..
Hevdîtin wê 24’ê Tebaxê li bajarê Siwîsreyê Cenivê pêk bên..
James Jeffrey: Nabe beşdarên hevdîtinan ji aliyê hêzên derve ve bên diyarkirin
Li ser mijarê Nûnerê Taybet ê Amerîkayê Ceyms Cefrî bersiv da pirsên rojnamevanan..
Cefrî ragihand ku ew ê beriya civînê li gel muxatebên navneteweyî hevîdîtinan pêk bîne û wiha got:
Bi qasî em dizanin, wê 50 ji aliyê rêjîmê, 50 muxalefeta Sûrî û 50 kesên din ji saziyên civakî û derdorên serbixwe beşdarî hevdîtinan bibin..
Li ser pirsa gelo wê QSD’ê yan jî nûnerên Bakur û Rojhilatê Sûrî werin vexwendin an na, Cefrîn ev bersiv da:
Kesên beşdarî pêvajoya “destûra bingehîn bibin” wê ji her devera Sûrî werin hilbijartin. Rewşa nûnerên Bakur û Rojhilatê Sûrî jî tê nîqaşkirin.
Nabe ku beşdarên hevdîtinan ji aliyê hêzên derve ve bên diyarkirin. Niha nûnerên hêzên muxelefetê, nûnerên hukûmeta Sûrî û nûnerên rêveberiya li Bakur û Rojhilatê Sûrî li ser mijarê gotûbêj kirin..
Nûnerên Taybet ê Amerîkayê hefteya derbasbûyî gotibû, divê îradeya li Bakur û Rojhilatê Sûrî beşdarî hevdîtinên Cenêvê bibe..
