Hemwextî civînên aliyên Lîbî li Mexribê, şandeyeke Lîbî, bi destpêşxeriyekê ji bo bajarê Sirtê, berê xwe dide Misirê.
Artêşa niştimanî jî dibêje, ji bo pêkanîna çi lihevkirinekê, mercê pêşîn, derxistina dewleta Tirk û çeteyên wê ji xaka Lîbyayê ye.
Endamê Meclîsa bilind a dewletê ya Lîbî Mihemed Xelîfe Necim ragihand, ku civînên li Mexribê bi rengekî erênî birêve diçin û çend lihevkirin derbarê danîna mekanîzmeyekê ji bo bidawîkirina gendelî û dabeşbûna dezgehan, pêk hatine.
Li aliyekî din, çavkanîne taybet eşkere kir ku îro çarşemê şandeyeke Lîbî berê xwe dide Misirê, ji bo pêkanîna lihevkirinekê derbarê bajarê Sirtê.
Li ser vê yekê, ji berpirsyarên artêşa niştimanî ya Lîbyayê Xalid Mehcûb ragihand ku, çi pêvajoyeke siyasî ji bo çareserkirina aloziya li welêt, divê derxistina Tirkan û çeteyên wan ji Lîbyayê esas bigire.
Mehcûb diyar kir ku pirsgirêk ne îmzekirina lihevkirinan e, lê cîbicîkirina wan e û destnîşand kir ku, di nav de lihevkirina Sixêrat, naveroka hemû lihevkirinên ku berya niha hatine îmzekirin, hatiye guhertin.
Xalid Mehcûb teqez kir ku hebûna dewleta Tirk û çeteyên xwe li Lîbyayê, sedema bingehîn a nebûna aramî û ewlehiyê li welêt e.
Destpêşxeriya ji bo bajarê Sirtê, rê li ber berfirehkirina diyalogên siyasî digire û girîngiyê dide pêkanîna hilbijartinan di dawiya sala 2021 de, her wiha lezê dide danûstandinên aborî û mekanîzmeya belavkirina dahatên petrolê û rê li ber hinardekirina petrolê vedike.
Ji ber zengîniya wê bi petrolê, bajarê Sirtê girîgtirîn bajarên Lîbyayê ye ku dewleta Tirk û hikumeta Wîfaqê ya Ixwanî hewl dida wê kontrol bikin û ji ber vê jî Misirê gefa destwerdana li Lîbyayê xwaribû.
