Dûran Kalkan plana dagirkirina Şengalê, dijberiya ENKS’ê ya li zimanê Kurdî û êrîşên dewleta Tirk yên li ser Rojava jî nirxand.
Kalkan diyar kir PDK ya ku ji Şengalê li ber DAIŞ’ê reviya dixwaze ji nû ve bi dest bixe û got; “PKK’ê dikin hedef, piştre jî êrişê dibin ser her tiştên ne ji wan. Ya ku bi navê PKK’ê dikin hedef, Kurdîtiya azad e, Şengal a xweser a demokratîk e”
Kalkan bal kişande li ser êrîşên li dijî Rojava û got, “Dibe ku êrişên mezintir bibin. Dibe ku hewl bidin dagirkeriyê bikin. Pêwîstiya faşîzma AKP-MHP’ê bi vê heye”
Endamê Komîteya Navendî ya PKK’ê Dûran Kalkan bal kişand ser peymana dagirkirina Şengalê û diyar kir ku peymana navbera ıraqê û PDK’ê de bêyî îradeya Şengalê hate çêkirin û diyar kir ev peyman ji aliyê Şengalê û gelê Kurdistanê ve nehatiye qebûlkirin.
Kalkan wiha got,
“PDK ya ku ji Şengalê ji ber êrişên DAIŞ’ê reviya dixwaze ji nû ve bi dest bixe. Destpêkê rêveberiya DYE’yê xwest bi vî rengî bibe. Dixwaze di çarçoveya armancên DYE’yê de rêveberiyên Iraq, Tirkiye û Başûrê Kurdistanê bibin yek, li dijî PKK’ê têbikoşin. Ya ku bi navê PKK’ê dikin hedef, Kurdîtiya azad e, Şengal a xweser û demokratîk e. Hewldana ji bo tunekirina jiyana azad a civaka me ya Kurdên Êzidî ye.”
Dûran Kalkan: PDK’ê bi vê peymanê sûc kir, divê ji Êzidiyan rexnedayina xwe bide
Kalkan diyar kir PDK’ê bi vê peymanê şaşitiyeke dîrokî û sûc kir û wiha dewam kir;
“Divê PDK rexnedayina xwe bide, eger şaşitî kiribe divê sererast bike. Tebaxa 2014’an nikare weke ku nebûye bihesibîne. Li şûna ku piştgiriyê bide Şengalê û xwe bide qebûlkirin, lê şaşitî û sûcên ku berê kiribû dubare dike. Li pişt plana li ser Şengalê dewleta Tirk û PDK hene. Emerîkayê jî xwest, Iraq jî neçarî vê hiştin.”
Dûran Kalkan: Buye mijara nîqaşê bê PDK çiqasî Kurd e
Kalkan bal kişande li ser dijminatiya dewleta Tirk ya li dijî Kurdan û asta ku niha PDK’ê gihiştiyê û got:
“Bûye mijara nîqaşê bê PDK çiqasî Kurd e. Demokratbûna wê, azadîparêziya wê ji xwe êdî kes qalê jî nake. Li Hewlêrê rêveberekî MÎT’ê hate kuştin, ji ber vê yekê hewl didin du ciwanên Kurd bi darve bikin. Yek ji plansazê qetilkirina Diyar Xerîb ku mirovekî ji Başûrê Kurdistanê bû, ew kesê MÎT’ê bû ku li Hewlêrê hate kuştin. Hezkirina ji dewleta Tirk, hezkirina ji MÎT’ê ewqasî jî ne rewşeke baş e.”
Dûran Kalkan: Dibe ku êrîşên mezintir bikin, pêwîstiya faşîzma AKP’ê bi vê heye
Dûran Kalkan destnîşan kir dewleta Tirk ya ku li Idlib, Lîbya û Qafkasyayê xitimiye ji nû ve berê xwe daye Bakur û Rojhilatê Sûriyê û got,
“Tirkiyê nekariye li wir encamê werbigire, li ser vê yekê berê xwe ji nû ve daye Bakur-Rojhilatê Sûriyê, lewma dema dawî êrişên xwe zêde kiriye. Dibe ku êrişên mezintir bibin. Dibe ku hewl bidin dagirkeriyê bikin. Pêwîstiya faşîzma AKP-MHP’ê bi vê heye.”
Dûran Kalkan: Careke din maskeyê li rûyê ENKS’ê kete xwarê
Kalkan mijara hevdîtinên yekîtiyê yên li Rojavayê Kurdistanê, dijberiya ENKS’ê ya li perwerdeya zimanê Kurdî jî nirxand û got,
“Zimanê Kurdî bila bibe zimanê perwerdeyê yan na; ev nîqaşeke ne rast e. Mirov vê nîqaşê dikarin weke sûcekî bibînin. Kes nikare Kurdan bi vî rengî nîqaş bike. Axaftina bi Kurdî dibe yan nabe, perwerdeya bi Kurdî dibe yan nabe; nîqaşeke wiha sûc e. Ev yek heqareta li Kurdîtiyê ye.
Kalkan destnîşan kir yên ku mijara ziman dixin mijara nîqaşê ti eleqeya wan bi Kurdîtiyê û netewperweriyê nîne û wiha got;
“Çima hêza bi navê ENKS vê yekê dide nîqaşkirin. Ev ENKS çi ye? Ji ku derketiye, ewqasî hatiye nepixandin. Dibêjî qey ENKS’ê şerê azadiya Rojava meşandiye, qîmeteke wiha didin wan. Careke din maskeya li ber rûyê wan kete xwarê.”
