Şerê di navbera Azerbeycan û Ermenistanê yê li ser Qerebaxê dewam dike û alî hev du bi binpêkirina agirbestê tewanbar dikin.
Istixbarata Rûsyayê jî ragihand ku agahiyên zelal di dest wan de heye ku Tirkiye bi istixbarata xwe tevî çeteyên wê yên li Sûriyê tevlî şerê li Qerebaxê bûne.
Ermenistanê Îro jî hêzên Azerbeycanê bi pêkanîna sûcên şer li Qerebaxê tewanbar kir û topbarana Azerbeycanê ya îro li ser paytexta Qerebaxê Stepanakert şermezar kir.
Ermenistanê diyar kir ku Azerbeycanê desteke yekser ji Tirkiyê digire, ku Tirkiyê çeteyan ji Sûriye û Lîbyayê ji bo piştgiriya wê dişîne.
Ji aliyê xwe ve Azerbeycanê got ku ew idîayên Ermenistanê ya topbarana paytexta Qerebexê red dikin.
Serokwerzîrê Azerbeycanê îro ragihand ku ji destpêka şerê li Qerebaxê wan 4 bajar, 3 bajaork û zêdeyî 200 deverên ku şênî tê de hene bi dest xistine.
Rûsya: Istixbarata Tirk tevî çeteyên xwe yên ji Sûriyê tevlî şerê Qerebaxê bûne
Li aliyê din, Serokê Istixbarta Rûsî, Sergey Naryshkin, eşkere kir ku istixbaratên hevkar li Rojhilata Navîn derbarê bidestxistina agahiyên ser tevlîbûna çeteyên biyanî ji bo şerê Qerebaxê alîkarî dane Rûsyayê.
Sergey Naryshkin got ku agahiyên teqez li cem wan hene ku terorîstên biyanî di serî de ji Sûriyê ne tevlî şerê li Qerebaxê bûne.
Serokê Istixbarta Rûsî da zanîn ku li gorî agahiyên di destê wan de istixbata Tirkî bi awayekî yekser tevlî şerê Qerebaxê bûye.
Di dawiya meha îlona derbasbûyî de şer navbera Azerbeycan û Ermenistanê li herêma Qerebaxê destpê kir.
Tevî ragihandina 3 agirbest ji bo rawestandina şer, herdu aliyan rojane hevdu bi şkandina agirbestê tewanbar dikin.
Ji sedema sereke jî ku şerê li herêmê dewam dike, şandina Tirkiyê çeteyên ji Sûriyê ber herêma şer e.
Tirkiyê derdora 2600 çete şandine Qerebaxê, ji wan 250 hatine kuştin
Îro jî Çavdêriya Sûrî ya Mafên Mirovan ragihand ku di şerê dawî yê li herêma Qerebaxê 10 çeteyên ji Sûriyê hatine kuştin.
Çavdêriya Sûrî da zanîn jî ku 12 termên nû yên çeteyên Sûrî ku li Qerebaxê hatine kuştin vegeriyane Sûriyê.
Li gorî Çavdêriya Sûrî heta niha Tirkiyê derdora 2600 çete ji Sûriyê şandine Azerbeycanê, ku ji wan heta niha derdora 250 çete di şerê Qerebaxê de hatine kuştin.
