Endamê Komîteya Rêveber a PKK’ê Karayilan destnîşan kir ku hem li qada navneteweyî hem jî li Kurdistanê pêngava “Bes e ji tecrîd, faşîzm û dagirkeriyê re; dem dema azadiyê ye”, gihîşt astekê, divê hîn bêhtir bê mezinkirin.
Karayilan bal kişand li ser tecrîda li Îmraliyê û diyar kir ejîma AKP-MHP’ê ya faşîst sîstema li Îmraliyê gav bi gav li hemû zindanan û tevahiya welêt bi cih tîne û got, “Keleha zilmê lawaz bûye û li ber hilweşînê ye. Divê her kes li her cihê lê ye xwedî li berpirsyariyên xwe derkevin”
Endamê Komîteya Rêveber ya PKK’ê Mûrad derbarê pêngava “Bes e ji tecrîd, faşîzm û dagirkeriyê re; dem dema azadiyê ye”, tecrîda li Îmraliyê, zextên li girtîgehan ji Radyoya Dengê Welat re axivî.
Karayilan bal kişand li ser tecrîda li Îmraliyê û diyar kir heta niha bi awayekî têrkerî rastiya Îmraliyê û rastiya rêber Ocalan ji raya giştî re nehatiye vegotin û wiha got;
“Di ser re 22 sal derbas bûn, hîn jî em dinerin raya giştî sîstema Îmraliyê rast fêhm nekiriye. Ev yek kêmasiya me ye. Îmralî, Sîstema êşkenceya psîkolojîke û faşîzm e. Rejîma AKP-MHP’ê ya faşîst vê sîstema li Îmraliyê gav bi gav li hemû zindanan û tevahiya welêt bi cih tîne.”
Karayilan: Divê herkes bi erka xwe rabe û Rêber Apo azad bibe
Karayilan da zanîn sîstema Îmraliyê li Kurdistanê jî bi şêweyê qirkirinê û faşîzmê xwe nîşan dide û wiha dewam kir;
“Tiştên li Îmraliyê tên organîzekirin dendik e û ev dendik li Kurdistanê û Tirkiyê tê belavkirin. Heta ku Sîstema Êşkenceyê ya Îmraliyê neyê parçekirin, ne pêkane ku demokrasî, edalet û hiqûq bê Tirkiyê û aştî û azadî bê Kurdistanê. Sîstema Îmraliyê rejîmeke şerê taybet e û sîstema qirkirinê ye ku li ser gelê Kurd tê meşandin.”
Karayilan destnîşan kir ku heta ku sîstema Îmraliyê hebe wê şer jî hebe, wê aştî tune be û got;
“Ji ber vê yekê jî hêzên alîgirê demokrasî û azadiyê, divê beriya her tiştî li dijî Sîstema Êşkenceyê ya Îmraliyê têbikoşin. Divê her kes li ber vê rabe ku li Tirkiyê pêşî li hiqûqê û demokrasiyê bê vekirin û Rêber Apo Azad bibe.”
Karayilan: Pêngav gihişt astekê lê têrker nîne; divê gel bêhtir çalakiyan bike
Endamê Komîteya Rêveber ya PKK’ê Mûrad Karayilan pêngava azadiyê ya li dijî tecrîd û dagirkeriyê jî nirxand û wiha pêde çû;
“Di çarçoveya pêngavê de asteke çalakiyan hate bidestxistin. Hem li qada navneteweyî hem jî li Kurdistanê gihîşt astekê, lê belê têrker nîne, divê hîn bêhtir bê kirin. Di serî de Bakurê Kurdistanê li hemû parçeyên Kurdistanê û derveyî welat divê civaka Kurd vê pirsgirêkê weke pirsgirêka sereke bibîne. Gelê me divê bi rengekî giştî hîn bêhtir çalakiyan bike.”
Karayilan: Li zîndanan zilm heye, li hember zilmê jî berxwedanek pîroz heye
Karayilan zext û êşkenceyên li zîndanên Tirkiyê ku li ser girtiyan tên kirin jî nirxand û wiha got:
“Li çiyayên Kurdistanê, li zindanên Kurdistan û Tirkiyê şoreşgerên vî welatî bi canê xwe rûmeta mirovahiyê diparêzin, li dijî êşkence û zilmê serî natewînin. Li zindanan zilm heye û li hemberî vê zilmê jî berxwedaneke pîroz heye. Em di vê rêyê de şehîdan didin. Emê xeyalên wan pêk bînin, tola wan ji dijmin.”
Karayilan: Keleha zilmê li ber hilweşînê ye, divê têkoşîn bê mezinkirin
Karayilan anî ziman ku Tevgera Apocî bi pêşengiya Rêber Apo li ber xwe dide û got,
“Li zindanan hemûyan Apocî li ber xwe didin. Li çiya, deşt, bajar, li welat û derveyî welat Tevgera Apocî li ber xwe dide, şerekî dîrokî dimeşîne. Li dijî zilmê berxwedaneke mirovahiyê tê mezinkirin. Keleha zilmê li ber hilweşînê ye. Divê her kes li her cihê lê ye xwedî li berpirsyariyên xwe derkevin.”
