Şandeya Rêveberiya Xweser a Şengalê derbarê peymana li ser Şengalê duh serdana Iraqê kirin îro bi Serokwezîrê Iraqê Mistefa Kazimî re civiya û daxwazên xwe pêşkêş kirin.
Daxwazên şandeyê wiha ne:
Divê parlamentoya Iraqê qirkirina 3`ê Tebaxa 2014`an wek jenosîd qebûl bike.
Divê rêveberiyeke nû ya serbixwe ku hemû Şengaliyan pêk tê were avakirin.
Şengal wekî parêzgeheke nenavendî ya girêdayî hikumeta federal a Iraqê bê qebûlkirin û hemû cûreyên şerên herêmî û navneteweyî ji Şengalê bên dûrxistin.
Divê biryara girêdayî alîkarîdayîna li hemberî malên hatine rûxandin, birîndar, malbatên şehîd û wendahiyan, Şengelê jî bigire nava xwe.
Biryarên têkildarî rêveberî, leşkerî, olî, neteweyî û ziman ên ku bi taybetî derbarê Êzidiyan, pêwîste ji aliyê Êzdiyan bi xwe ve bên dayîn.
Her wiha rê ji bo ti hêzeke derve neyê dayîn ku dest li kar û barên hundirîn ên Êzidiyan bikin.
Divê ji bo Şengalê xizmetên sereke bên kirin, mercên guncew ji bo vegera koçberan bên amadekirin.
Divê ji bo kesên hatine revandin komîteyeke şopandin û lêkolînê were avakirin.
Bi hezaran leşkerên Êzidî di nasname wezareta hundirîn û parastinê de hene, em dixwazin ku ew leşker ji bo parastina herêmên xwe, ji bo Şengalê bên veguhestin.
Em banga vekirina dergehê sînorî yê herêma Para yê di navbera Iraqê û Sûriyê de dikin. Ji ber ku tekane rê ye ku kesên ji girtîgehên DAÎŞ`ê yên li Sûriyê hatine rizgarkirin têde vegerin malên xwe.
Her wiha wekî dergeheke fermî bikeve bin çavdêriya rêveberiya qezaya Şengalê û hêzên ewlehiyê yên herêmê.
Ev daxwazeke sereke ya şêniyên Şengalê ye.
Divê şêwirmendeke taybet ê serokwezîr ku bikaribe kar û barên Êzidiyan re mijûl bibe, were diyar kirin da ku bikaribe azarê me bi awayekî ewle bigihêjin navenda biryarê.
Ji bo parastina demografiyê divê erdên Êzidiyan ên li Nînewa û Şengalê ku di serdema sîstemên berê de ji wan hatine standin, bên vegerandin.
Divê êrîşên dewleta Tirk ên li ser Şengalê were rawestandin.
Em banga vekirina navendeke taybet a polîsên Şengalê dikin, navenda wê li Şengalê be û bi rêya lijneyên Wezareta Karên Hundir 5 hezar endam tevlî bibin û di dema girtina van endaman de hevsengiya civakî li ber çavan bê girtin.”