Cîgirê Hevserokatiya Buroya Têkiliyên Derve ya Bakur û Rojhilatê Sûrî Fener El-Kiêt diyar kir ku şandeyên derve piştgiriya xwe bi Rêveberiya Xweser re diyar dikin. Fener destnîşan kir ku şandeyan, her wiha teqeziyê li ser rawestandina êrîşên dewleta Tirk a dagirker jî dikin.
Di van demên dawî de, şandeyên diplomatîk li pey hev serdana herêmê dikin.
Herî dawî, şandeya Belçîkî, Tacîkistanî û komîteya azadiya olan a Amerîkî serdana herêmê kiribûn.
Ev şande bi rayedarên Rêveberiya Xweser re civiyan û serdana kampên koçberên Serê Kaniyê jî kirin.
Ev serdan, hemwextî êrîşên dewleta Tirk a dagirker û çeteyên wê yên li ser herêmê, pêk hat û bi vê yekê ji nêz ve rewşa herêmê dîtin.
Cîgirê Hevserokatiya Buroya Têkiliyên Derve ya Bakur û Rojhilatê Sûrî Fener El-Kiêt ji televizyona me Ronahî TV re axivî û diyar kir ku herêm gerekdarî van serdanan e.
Em gerekdarî van serdanan in.
Gelek şandeyên fermî ji dewletên derve, çi şandeyên ragihandinê çi jî yên rêxistinî, serdana herêmê kir.
Ew jî ji bo rewşa herêmên Bakur û Rojhilatê Sûrî ji nêz ve bişopînin û ji tecrubeya Rêveberiya Xweser sûd wer bigirin.
Jixwe, mijarên nîqaşê yên van serdana jî, êrîşên dagirkeriya Tirk li ser herêmê û dosyaya çeteyên DAIŞ’ê ne.
Lewma bi rêya van şandeyan tê xwestin ku sînorek li hember sûc û êrîşên dagirkeriya Tirk were danîn.
Fener El-Kiêt destnîşan kir ku ev şande di hevdîtinên xwe hertim helwesta xwe li hemberî êrîşan nîşan didin û teqeziyê li ser rawestandina êrîşan dikin.
Hertim di van hevdîtinan de, me bal dikşand ser aliyê mirovî, alîkarî, dorpêça li ser herêmê û kampên koçberan.
Bi taybet jî bandora êrîşên dagirkeriya Tirk li herêmên Bakur û Rojhilatê Sûrî.
Her wiha dosyaya malbatên DAIŞ’î yên di kampa Holê de jî.
Di nava şerê Sûriyê yê 9 salan de, ku hemû herêmên welat îro ne aram in, tenê herêmên Bakur û Rojhilatê Sûriyê aram in, ew jî bi saya tecrubeya Rêveberiya Xweser.
Cîgirê Hevserokatiya Buroya Têkiliyên Derve ya Bakur û Rojhilatê Sûrî anî ziman ku şende ji tecrubeya Rêveberiyê kêfxweş in û wê êrênî dibînin, lewma soza destekdayîna wê didin.
Teqez şandeyên serdana herêmê kirine, tecrubeya Rêveberiya Xweser erênî dîtine.
Bi vê tecrubeyê kêfxweş bûne û piştgiriya xwe jî nîşan dane, ku dê hikumetên wan alîkariyê bidin Rêveberiya Xweser.
Da ku ev tecrube bê pêşxistin û avakirin, ji ber wê aramî û ewlehî bo herêmê misoger kir.
