Li bajarê Qamişloyê, şandeyek ji parlamentoya Awisturyayê bi berpirsên Rêveberiya Xweser re civiya.Şandeya Almanî û Finlandî ku pêncşema borî serdana herêmê kiribûn destnîşan kir ku bi armanca pêkanîna danûstandinan bi Rêveberiya Xweser re li ser rewşa mirovî, serdana pêk anîne.
Duh şandeyek ji parlementer û akademîsyenên Awisturyayê serdana herêmên Bakur û Rojhilatê Sûrî kir û bi nûnerên buroya Têkiliyên Derve re civiya.
Şande ji parlamenterên Awisturya yên Partiya Kesk, Partiya Gel a Xrîstiyan a Muhafazakar û profesorê zanista siyasî li Zanîngeha Viyanayê Thomas Schmidinger pêk tê.
Şandeyê di hevdîtina xwe de piştevaniya xwe bi herêmê re nîşan da..
Pêncşema borî jî, Şandeyeke almanî û yeke finlandî bi berpirsên Rêveberiya Xweser û MSDê re hevdîtin kiribûn û pergala rêveberiyê û êrîşên artêşa Tirk a dagirker û çeteyên wê nîqaş kirin.
Şandeyên Ewropî: Gelê herêmê tevî zehmetiya parastina rêveberiya xwe kir
Nûnerê taybet ê Kar û Barên Wezareta Karên Derve ya Finlanda ya NY Yossi Tanner li gel Ajansa Nûçeyan ANHA diyar kir ku wan ji bo pêkanîna danûstandinên bi Rêveberiya Xweser û şopandina rewşa li kampan, serdana herêmê kiriye.
“Gelên herêmê tevî astengiyan parastina rêveberiya xwe kiriye.
Rewşa li kampan jî, ji ber kêmbûna pêwîstiyan dijwar e.
Em spasiya Rêveberiya Xweser dikin ku alîkariya kampan dike.”
Li gorî Tanner ew girîngiyê didin xebatên hevbeş, bi taybet ên girêdayî sekna li hember tundraw û terora niha û pêşerojê, da ku ewlehiyek ji tevahiyan re pêk were.
Berî niha jî me danûstandin bi Rêveberiya Xweser pêk anîbûn.
Bi teqezî em dikarin bi hev re, xebatên hevbeş pêk bînin û diyalogê bikin.
Nûnerê taybet ê Kar û Barên Wezareta Karên Derve ya Finlanda ya NY teqez kir ku dê tiştê dîtiye bi hikumeta welatê xwe re parve bike û piştrast kir ku pêwîst e xweragirtin hebe, da ku aştî li herêmê çêbibe.
Her wiha serokê gerînendeya Karên Konslosxane û Koçberiyê ya Karên Derve ya Almanyayê Kurt George Stockell Stell Fred jî da zanîn ku serdana wan mirovî ye, ji bo pêkanîna danûstandina bi Rêveberiya Xweser re.
“Sedema serdana me mirovî ye û me danûstandina bi Rêveberiya Xweser re pêk anîne.
Her wiha me li ser piştevaniya mezin a ku Almanya di warê mirovî de dike nîqaş kir.
Piştevaniya herî girîng jî li ser asta navneteweyî û asta rêxistinên mirovî yên li ser erdê ne.”
Herdu şandeyan di dawiya hevdîtinên xwe de, jmarek zarok û jinên Almanî û Finlandî wergirt.
