Îro dema hikûmeta nû ya Yemenê gihişt balafirgeha Edenê ji bo dest bi karê xwe bike, êrîşek li dijî wê pêk hat.
Di êrîşê de gelek kes hatin kuştin û birîndar bûn.
Hikûmeta Yemenê jî, Hûsî ji ber vê êrîşê tewanbar kir.
Li gorî dezgehên çapemeniyê yên Erebî, dema balafira ku tê de endamên hikûmeta Yemenê yên nû tê bûn giha balafirgeha Edenê êrîşek bi fûzeyan pêk hat.
Hat zanîn ku çend fûze li odeya pêşwaziyê ya li balafirgehê ketin.
Her wiha di dema êrîşa bi fûzeyan êrîşeke bi guleyan ser balafirgehê pêk hat.
Waliyê Edenê: Di êrîşa ser balafirgeha edenê 13 kes hatin kuştin
Li gorî waliyê Edenê Ehmed Hamid Limlis di êrîşê de 13 kes hatin kuştin û 65 kes jî birîndar bûn.
Li gorî çavkaniyên tenduristî û ji hikûmetê di êrîşa ser balafirgehê 26 kes hatin kuştin û derdora 60 kes birîndar bûn.
Hat gotin ku kesên hatin kuştin û birîndar bûn, sivîl û berpirsên herêmî yên ji Edenê bûn.
Hin çavkanî teqez kir ku beriya êrîşê, balafirên bêmirov li ser balafirgeha Edenê digeriyan.
Reuters: Li dijî hikûmeta nû li qesra El-Me’aşîq teqînek pêk hat
Li gorî Reutersê piştî ku endamên hikûmeta nû ji bo qesra El-Me’aşîq hatin şandin li nêzî deverê dengê teqînekî hat kirin.
Derbarê teqînê de ti agahiyên piştrast nehatin bidestxistin.
Mieamer El-Iryanî: Hûsî berpirsê êrîşa ser balafirgeha Edenê ne
Ji aliyê xwe ve Wezîrê Ragihandinê yê Yemenê Mi’emer El-Iryanî ragihand ku hemû endamên hikûmeta nû selamet in.
Mi’emer El-Iryanî pêkanîna vê êrîşê xiste sûtyê Hûsiyan ku girêdayî Îranê ne.
Welatên Ereb êrîşa li ser balafirgeha Edenê şermezar kir
Bi daxuyaniyên cuda jî Siûdiyê, Îmarat, Urdin, Misir û Komkara Erebî êrîşa li ser balafirgeha Edenê şermezar kir û hat gotin ku armancgirtina balafirgeha Edenê armancgirtina Tifaqa Riyadê ye ku banga aştiyê ji bo Yemenê dike.
Nûnerê navdewletî yê Yemenê banga vegera li çareya siyasî kir
Nûnerê Navdewletî yê ji bo Yemenê, Martin Griffiths jî êrîşa ser balafirgeha Edenê şermezar kir û banga vegera li çareya siyasî kir.
Endamên hikûmeta Yemenê ya nû wê li Edenê dest bi karê xwe bikin
Hêjayî gotinê ye ku hikûmeta Yemenê ya nû ya ku bi serokartiya Mu’în Ebdulmelik e beriya du rojan sonda destpêkirina karên xwe li pêşiya serokomar Ebidrebû Mensûr Hadî xwar.
Endamên hikûmeta Yemenê ya nû ji paytexta Siûdiyê Riyadê dihatin Edenê daku dest bi karê xwe li paytexta demkî bike.
Beriya niha jî, berdevkê hikûmeta Yemenê gotibû ku gava vegera hikûmetê li Edenê di çarçoveya Tifaqa Riyadê pêk tê.
Berdevkê hikûmeta Yemenê ji bo pêşîlêgirtina li hêzên Hûsiyan, li ser pêwîstiya xurtkirina xebatên aborî û leşkerî teqez kiribû.
