Piştî kûrbûna aloziyan di navbera herdu welatan de, dewleta Tirk dixwaze rûpeleke nû ya têkiliyan bi Fransayê re veke.
Wezîrê Derve yê Tirkiyê idia dike, wî û hempîşeyê xwe yê Fransî, li ser asakirina têkiliyên herdu welatan li hev kiriye.
Lê heta niha Fransa li ser vê yekê ti helwest nîşan nedaye..
Enqere hewl dide xwe nêzî Fransayê bike û çavan ji ser nakokiyên berê bide dagerandin.
Wezîrê Derve yê Tirkiyê Mevlût Çavîşoglu ragihand ku ew û hempîşeyê xwe yê Fransî Jean Yves Lo Diran li ser asakirina têkiliyên herdu welatan li hev kiriye.
Çavîşoglu idia kir ku herdu welat dijminahiya hev nakin û telefona wî ya dawî bi Lo Diran re pir erênî bû.
Wezareta Derve ya Fransayê behsa vê peywendiyê nekir, lê li gorî agahiyan, Parîs jî dixwaze vê gavê bavêje û têkiliyan bi Enqereyê re asa bike ku herî dawî balyozekî xwe li wir erkdar kiriye.
Lê çavdêr dibînin ku, dibe vegerandina van têkiliyan ne bi vê hêsaniyê pêk were.
Koşka Élysée dibîne ku arîşeya bi Tirkiyê re ti encam bi xwe re neanîn û rê li ber zêdegaviyên Tirkiyê li Sûriye, Lîbya, Rojhilatê Deryaya Spî û herî dawî jî li Qerebaxê negert.
Her wiha dijminahiya Parîs li dijî Enqere, ji aliyê hevkarên wê yên YE ve nehat destekkirin.
Nakokiyên di navbera herdu aliyan de li gelek dosyayan vedigerin, ji wan:
Êrîşa dagirkeriya Tirk a bi navê qaşo “Kaniya Aştiyê” li li dijî Bakur û Rojhilatê Sûriyê û her wiha piştgiriya Enqere bo hikumeta Wîfaqê ya Ixwanî li Lîbyayê.
Piştre jî bi derketina aloziya li Rojhilatê Deryaya Spî û nakokiyên Tirkiye bi Yûnanistanê re û şerê li Qerebaxê, aloziya di navbera Parîs û Enqereyê de hîn kûrtir bû.
Helwesta nerm a Tirkiye ya li ser zimanê wezîrê wê yê derve, di vê demê de, tirsa Enqere ji zêdebûna dijminên wê dide der, tiştê ku zirareke mezin digihîne berjewendiyên wê yên stratejîk.
Ev yek jî di demekê de tê, ku serokê nû hilbijarî yê Amerîkayê Joe Biden, ku piştî çend rojan dest bi kar dike, bi neyînî li siyasetên Tirkiyê yên derve dinêre.
