Şandeyeke payebilind a Iraqê îro serdana Şengalê kir û bi rêveberiya xweser ya Şengalê re civiya.
Rêveberiya Şengalê pêşniyar û daxwazên xwe pêşkêşî şandeya Iraqê kirin.
Daxwaz hat kirin ku dorpêça ser Şengalê rabe û çûn û hatina bi Bakurê Sûryê re were hêsankirin.
Şandeyek payebilind a Iraqê ku ji serokê artêş, şêwirmendê û nûnerên ewlekariya netewî pêk tê, serdana Şengalê kir.
Rayedarên Iraqê li baregeha leşkerî ya artêşa Îraqê bi nûnerên Rêveberiya Xweser ya Şengalê re civiyan.
Di civînê de li ser navê Rêveberiya xweser rayedarên Tevgera Azadiya Jinên Êzidî, Partiya Azadî û Demokratsiya Êzidiyan, Desteya Rêveber a Şengalê, Meclîsa Xweseriya Demokratîk a Şengalê amade bûn.
Rêveberiya Xweser a Şengalê bi 3 sernavan pêşniyar û daxwazên xwe pêşkêşî şandeya Iraqê kirin.
Rêveberiya Şengalê di daxwaza xwe ya yekê de, xwest ku peymana navbera hikûmeta Iraq û PDK’ê ya li ser Şengalê were betalkirin ji ber ku bêyî Şengaliyan ev peyman pêk hatiye.
Di daxwaza duyemîn de jî, hat gotin ku divê hikûmeta Iraqê rê ji vegereke hêsan a Şengalê re veke û ji bo avakirina Şengalê alîkarî ji aliyê hikûmetê ve were dayîn.
Rêveberiya Şengalê di daxwaza ya sêyemîn de jî hin daxwaz û pêşniyar pêşkêşî şandeya Iraqê kirin,
Hin ji wan daxwazan wiha wiha ne:
-Rêveberiya Xweser ya Şengalê were erêkirin.
-Qada Hewayî ya Şengalê ji êrîş û destdirêjiyên herêmî ya li dijî welatiyan were girtin.
-Naskirina qanûnî ya hêzên ewlehiya hundirîn li Şengalê.
-Alîkarî û xurtkirina Yekîneyên Berxwedana Şengalê (YBŞ).
-Dawîanîna dorpêça ser Şengalê û hêsankirina çûn û hatina bi Bakurê Sûryê re.
Şandeya Iraqê: Em ê daxwazên Şengalê pêşkêşî serokwezîr bikin
Şandeya Iraqê jî diyar kir ku ew ê daxwazên rêveberiya Şengalê pêşkêşî Serokwezîrê Iraqê Mistefa Kazimî bikin.
Şandeya Iraqê diyar kir ku Şengaliyan kedek mezin û şehîd dane, lewma ev ked nayê jibîrkirin û ewê hewl bidin li gorî vê rastiyê tev bigerin.
Rêveberiya Şengalê: Em li bendê ne ku Iraq rêzê ji daxwazên me re bigire
Meclisa Xweseriya Demokratîk a Şengalê jî têkildarî serdan û hevdîtina şandeya Iraqê ya li Şengalê daxuyaniyek da û got ku bi saya berxwedana gel ev civîna îro bi hikûmeta Iraqê re pêk hat.
Meclisa Xweseriya Demokratîk a Şengalê diyar kir ku wan di civînê de bi eşkere ji rayedarên Iraqê re ragihand ku divê pirsgirêk bi rêya diyalogê bên çareserkirin, ne bi gef û hêzê.
Meclîsê diyar kir ku ew li bendê ne ku Iraq rêzê ji daxwazên Şengaliyan re bigire û bingeha danûstandinan ava bike.
