Hevserokê Giştî yê HDP’ê Mîthat Sancar peyama dîrokî ya Rêber Apo a Newroza 2013’an de bi bîrxist û diyar kir pêvajoya çareseriyê a ku hatibû destpêkirin ji ber hesabên desthilatdariyê bi dawî bû.
Sancar banga xwedîderketina li peyama Newrozê ya Rêber Ocalan kir.
Mîthat Sancar şêhîdên komkujiya Helebcê jî bibîranî diyar kir ev êrîş ji Kobanê heta Şengalê hê jî didomin.
Hevserokê Giştî yê HDP’ê Mîthat Sancar di civîna koma partiya xwe de axivî.
Sancar derbarê salvegera 33’emîn a komkujiya Helebcê de axivî û got,
“Beriya niha 33 salan li Helebçeyê bêhneke xweş a sêvan belav bû. Piştî çend deqîqeyan bêhna wan çikiya. Bi bombeyan piraniya wan jin û zarok 5 hezar kes hatin kuştin.7 hezar kes birîndar bûn. Ev sûcê li dijî mirovayetiyê ye û qirkirin e.”
Sancar da zanîn di Enfalê de bi giştî 182 hezar Kurd hatin kuştin û got,
“Ev êş hê jî didome, ji Kobanê heta Şengalê xwe dide der.”
Sancar bang hêzên navnetewî kir ku komkujiya Helebcê nas bikin da ku bibe roja bibîranînê ya navneteweyî.
Mîthat Sancar: Divê xwedî li peyama dîrokî ya Newroza 2013’an bê derketin
Mîthat Sancar bi hatina Newrozê re jî Newroza sala 2013’an bibîrxist û bal kişande li ser peyama dîrokî a Rêber Apo ku di Newroza Amedê de li pêşberî mîlyonan hat xwendin.
Sancar bal kişande li ser pêvajoya çareseriyê a ku hatibû pêşxistin û wiha dewam kir,
“Pêvajoya çareseriyê hebû û ji ber hesabên desthilatdariyê ew pêvajo bi dawî bû. Piştî wê berdêlên giran hatin dayîn. Li holê ne demokrasî ma, ne hiqûq ne jî edalet. Di Newroza 2013’an de bangeke girîng hatibû kirin. Ew banga wê rojê li wir hate xwendin divê îro jî xwedî lê were derketin.”
Sancar diyar kir ku ew aştiyê ji desthilatdariyê naxwazin û got,
“Heke di doza Kurdan de em ê ber bi çareseriyê ve biçin, navnîşana vî tiştî civak bi xwe ye, hêzên demokrasî û mûxalefet e. Mûxalefet û hêzên demokrasiyê divê çareseriyeke demokratîk û aştiyeke adilane deyne ber xwe.”
Hevserokê Giştî yê HDP’ê Mîthat Sancar bal kişande li ser girîngiya Newroza îsal û bi van gotinan bi dawî kir,
“Banga xurt a ku wê Newroz derxe holê wê li vî welatî çareserî û aştiyê bi xwe re bîne. Em bi vê heyecanê amadekariya Newrozê dikin.”
