Vekişandina Tirkiye ji peymana Stenbolê ya rêgirtina li pêş tundiya li dijî jinê, rastî gelek bertekan li hindir û derve tê.
Serokê Amerîkayê Joe Biden dilsariya xwe ji ber vê yekê anî ziman, her wiha YE, Fransa û Almanyayê jî biryara Erdogan rexne kir û ew bi gavekê ber bi paş ve pênase kir.
Serokê Amerîkayê Joe Biden ragihand, ew ji ber vekişîna Tirkiye ji peymana Stenbolê ya 2011’an a rêgirtina li ber tundiya li dijî jinê, pir dilsar bûye.
Înê, Tirkiye bi biryarnameya Serokkomariyê, îmzeya Peymana Stenbolê ya ku ji bo jinan pir girîng bû, betal kir û îmzeya xwe bi paş ve kişand.
Ev peyman li ser wekheviya zayendiya civakî hatibû avakirin.
Biden bi daxuyaniyekê diyar kir, ku ev gave Tirkiye, tevgera navdewletî ya ji bo jinavbirina tundiya li dijî jinê, asteng dike û got:
“Divê hemû welat destekê bidin vê tevgerê, lê Tirkiye berevajî vê yekê xwe ji peymaneke wisa vedikişîne, li ser asta cîhanê ev gavek ber bi paş ve ye.”
YE banga li Tirkiyê kir ku ji biryara vekişîne vegere
Her wekî jimarek serkirdeyên Ewropî fikarên xwe ji ber vê biryara Tirkiyê anî ziman û bang li Erdogan kir ku li peymanê vegere.
Berpirsê siyaseta derve ya YE José Borrell mixabîniya xwe ji ber biryara Erdogan anî ziman û destnîşan kir ku ev yek metirsiyê li ser jinan û mafên wan ên sereke li Tirkiyê çêdike û nameyeke tirsnak bo tevahiya cîhanê dişîne.
Her wiha seroka Komîseriya Ewropî Ursula von der Leyen got: Pêwîstiya jinan bi çarçoveyeke qanûnî ji bo parastina wan heye.
Ji aliyê xwe ve, Parîs û Berlînê vekişandina Tirkiye ji peymanê rexne kir û ew weke gavekê ber bi paş ve di warê mafên mirovan de pênase kir.
Vekişandina Erdogan ji vê peymanê di demekê de tê ku rêxistinên hiqûqî teqez dikin, ku sûcên kuştinê li dijî jinê di nava 10 salan de, 3 qatan zêde bûne û herdu salên dawî ji sedî 70 bilind bûne.
