Ji hefteya borî ve hikumeta Şamê deriyên di navbera herêmên Rêveberiya Xweser û yên di bin kontrola xwe de girtine, ev yek jî bandoreke neyînî li rewşa mirovî û jiyanî ya şêniyên herêmê dike.
Derbarê girtina deriyan de şêniyên Reqayê nerazîbûn nîşan dan û diyar kirin ku ev yek tiştekî dermirovî ye û wê rewşê zehmettir bike.
Ev zêdetirî hefteykê ye ku hikumeta Şamê dergehên bi ser herêmên Rêveberiya Xweser re girtine. Ev yek jî bandorê li rewşa mirovî û jiyanî ya şêniyan kiriye.
Şêniyên ku ji ber bihabûna nirxên kelûpelan zehmetiyan dikşînin, bi girtina dergehan zehmetiyên wan duqatî bûye.
Di vê çarçoveyê de şêniyên Reqayê ji ANHA`yê re axivîn û û fikarên xwe anîn ziman.
Şêniyê bi navê Mihemed El-Xidir ê ji gundên başûrê Reqayê diyar kir ku bi girtina dergehan rewşa wan a jiyanê dijwartir buye û nirxê kelûpelan duqatî berê bûne.
Şêniya bi navê Fatme El-Elî diyar kir ku nabe ev yek pêk were û got, ” ji ber ev der jî axa Sûriyê û armanca rêjîmê ji vê yekê tengavkirina gel ji aliyên mirovî û jiyanê ve ye.”
Karmendekî hikumeta Şamê ku nexwest navê xwe eşkere bike diyar kir ku li herêmên di bin kontrola hikumetê de û bi taybetî gundewarên başûrê Reqayê, gelek tişt kêm in û got,
“girtina dergehê, ji bo tevaya Sûriyê ne baş e, kiryarek nemirovî ye û zirarê dide gelên Sûriyê.”
