Duh polîstên AKP’ê li Amedê bi ser komeleya Rosa û malan de girtin zêdeyî 20 jin binçavkirin.
Endamên TJA , HDP’ê, DBP’ê, û gelek rêxistinên jinan bertek nîşanî êrîşên qirkirina siyasî yên li Tirkiyê dan û diyar kirin ku ev êrîş aloziya ku desthilat di navê de ye nîşan dide û hat gotin divê hemû jinên hatine binçavkirin bên berdan.
Bi biryara serdozgeriyê polîsan duh bi ser Komeleya Jinan a Rosa ya li navçeya Peyasê ya Amedê û gelek navnîşanan de girtin, nûçegihana JIN NEWS’ê Berîtan Canozer, 22 jin binçav kirin.
Platforma Jinan a Enqereyê derbarê 22 jinên ku li Amedê hatin binçavkirin de li avahiya Sendîkaya Kedkarên Buroyê (BES) daxuyaniyek da.
Di daxuyaniyê de got, têkoşîna jinê nikare bê astengkirin, bila jinên hatine binçavkirin demildest bên berdan.
”Em ê her tim li qadan têkoşîna xwe bilind bikin”
Aktivîstên TJA , HDP’ê û DBP’ê li dijî girtina siyasetmendarên jin daxuyaniyek dan û gotin:
Dev ji polîtîkayên xwe yên dijminatiya jinan berdin, hûn nikarin dawî li têkoşîna me bînin. Em ê her tim li qadan bin.
MED-DER: Di van êrîşan de jinên xwedî vîn di armanca desthilatdariyê de ne
Komeleya Lêkolînê ya Ziman û Çandên Mezopotamyayê jî bertek nîşanî binçavkirina jinan da û wiha anî ziman:
Di van êrişan de hemû jinên xwedî vîn ku ji bo parastina nirx, rûmet û destkeftiyên demokrasiyê têdikoşin, di hedefa Desthilatdariyê de ne. Divê demildest ev jin bên berdan.
MKGP: Em ê li dijî zihniyeta mêr bi pênûsa jinê, nivîsandina xwe bidomînin
Platforma Rojnamegerên Jin a Mezopotamyayê (MKGP), derbarê Berîtan Canozer û jinên ku hatin binçavkirin de daxuyaniyek da.
Di daxuyaniyê de hat diyarkirin ku ev ne êrîşa yekem a li hemberî jinê ye û got:
Şopandina nûçeyên hevalên me wekî delîlên sûc di dosyayayan de cih digire.Platformê di dawiyê de da zanîn ku ew ê li dijî zîhniyeta mêr bi pênûsa jinê, nivîsandina xwe bidomîne.
Platforma Ked û Demokrasiyê: Ev êrîş tengasiya desthilatdariyê nîşan dide
Platforma Ked û Demokrasiyê ya Amedê jî bi daxuyaniyek bertek nîşanê binçavkirinan da.
Daxuyanî Sekretera Şaxa Jimara 2’yan a Egîtîm Senê ya Amedê Songulcan Şîmşek ce hat xwendin
Songulcan balkişande lis er polîtikaya dewletê ya yekperestiyê û da zanîn ku desthilat hemû bîr û baweriyên cuda tune dihesibîne. Ev jî tengavbûna desthilatê dide nîşandan.
Di dawiyê de platformê banga mezinkirina têkoşînê dan û xwestinku demildest hevalên wan bên berdan.
