Cîgirê Hevserokatiya Meclisa Rêveber a Rêveberiya Xweser Cozêf Lehdo ji ber qutkirina avê ji ser şêniyên Hesekê, hişyariya bobelateke mirovî da. Lehdo bêdengiya civaka navnetewî rexne kir û banga destwerdanê lê kir.
Cozêf Lehdo, Cîgirê Hevserokatiya Meclisa Rêveber a Rêveberiya Xweser hişyarî da, ku dewleta Tirk bi qutkirina avê, şerê 5 milyon kes dike.
Rêveberiya Meclisa Kantona Hesekê Duşemê ji ber qutkirina ava vexwarinê ji aliyê dewleta Tirk ve, rewşa awarte ragihand û diyar kir, ew ê bi rêya sehrîcan, avê li şêniyan belav bike.
Stasyona avê ya Elok li Serê Kaniya dagirkirî ye û ava vexwarinê dide şêniyên Hesekê.
Cozêf Lehdo: Çete kehrebê didzin û av nagihêje şêniyan
Cozêf Lehdo destnîşan kir ku kehrebe bi giştî ji bo satasyonê nayê xebitandin û çete kehrebeyê ji bo vebe.ranînê bi kar tîne.
Li gorî lêgerînên me hat eşkerekirin ku qutkirina avê ya bi sedema kehrebeya ku ji bo xebitandina stasyona Elokê tê şandin, bi giştî nayê xebitandin.
Lê belê komên çete yên li herêmên dagirkirî, kehrebê ji bo veberanînê didin gund û bajaran û di encamê de stasyona Elokê nikare avê bi awayekî têr bide. Ji lew re qut dibe û nagihêje şêniyan.”
Qutkirina avê, şêwazê şer ê herî xeter e ku niha ji aliyê dewleta Tirk a dagirker ve tê bikaranîn.
Niha rêjeya ava çemê Firatê jî kêm kiriye, li şûna ku 500 m² di saniyekî de bide, 200 m² dide, di encamê de jî ava çem kêm dibe û bandor li berhemên çandiniyê dike.
Cozêf Lehdo: Divê civaka navnetewî destwerdanê bike
Cozêf Lehdo anî ziman ku dewleta Tirk ji zêdeyî 40 salî ve, qanûnên navneteweyî yên têkildarî çemên hevbeş (Firat û Dicle) ku di Sûriyê û Iraqê re derbas dibin, binpê dike û tevahî qanûnên ku bi wan dewletan re îmze kirine, paşguh dike
Cîgirê Hevserokatiya Meclisa Rêveber a Rêveberiya Xweser bêdengiya civaka navnetewî li hemberî kirinên dewleta Tirk, bi tundî rexne kir û jê xwest ku vê mijarê di ber çavan re derbas bike.
